‘முறையான திட்டமிடல், கடின உழைப்பு இருந்தால் வெற்றி எளிது’ - ‘இந்து தமிழ் திசை' நாளிதழ், சங்கர் ஐஏஎஸ் அகாடமி சார்பில் ‘ஆளப் பிறந்தோம்' வழிகாட்டு நிகழ்ச்சி

‘இந்து தமிழ் திசை' நாளிதழ், 'சங்கர் ஐஏஎஸ் அகாடமி'யுடன் இணைந்து நடத்திய யுபிஎஸ்சி, டிஎன்பிஎஸ்சி தேர்வெழுதுவோருக்கான ‘ஆளப் பிறந்தோம்' என்ற வழிகாட்டு நிகழ்ச்சி திருச்சி மதி இந்திராகாந்தி கல்லூரியில் நேற்று நடைபெற்றது.

நிகழ்ச்சியில், சிறப்பு விருந்தினராக கலந்துகொண்ட மத்திய மண்டல ஐ.ஜி வே.பாலகிருஷ்ணன் பேசியது: இந்திய குடிமைப்பணி என்பது மாற்றத்தைக் கொண்டு வரக்கூடிய ஒரு பணி. ஒரு காலத்தில் உயர்தட்டு மக்கள் மட்டுமே பெறக்கூடிய நிலையில் இருந்த குடிமைப்பணி தற்போது ஓபிசி, எஸ்சி, எஸ்டி என அனைத்து தரப்பு மக்களும் பெறக்கூடிய நிலையை எட்டியுள்ளது. அதேபோல கிராமத்திலிருந்தும் நிறைய மாணவர்கள் வெற்றி பெறுகின்றனர். பிறக்கும்போது அனைத்து குழந்தைகளும் சம அளவு மூளையுடன் பிறக்கின்றன. ஆனால் வளரும்போது எடுக்கக்கூடிய பயிற்சி, முயற்சியைப் பொறுத்தே நமக்கு அனைத்து திறமைகளும் கிடைக்கின்றன.

இத்தேர்வுக்கு தயாராகும் நபர்கள் பொது அறிவு, புவியியல், வரலாறு, தகவல் தொடர்பு, அரசியலமைப்பு சட்டம் போன்றவை குறித்து நன்றாக தெரிந்து வைத்திருக்க வேண்டும். ஒரே சமயத்தில் பல்வேறு பிரச்சினைகள் வந்தால், அதை சமாளிக்க தயாராக இருக்க வேண்டும். எந்த சூழலிலும் தெளிவான முடிவெடுக்கும் திறனை வளர்த்துக் கொள்ள வேண்டும். எந்த ஒரு பாடத்தையும் கடமைக்காக படிக்காமல், முழு ஈடுபாட்டுடன், இலக்கு நிர்ணயித்து படிக்க வேண்டும்.

குறிப்பெடுத்து படித்தால், மீண்டும் திருப்பிப் பார்க்கும்போது எளிதில் புரியும். குழுவாக இணைந்து படித்தால் கூடுதல் தகவல்களை தெரிந்து கொள்ளலாம். நேர மேலாண்மை மிக முக்கியம். வெற்றி என்பது அனைவருக்கும் எளிதில் கிடைக்கக்கூடியது. பயிற்சியின் மூலம் எந்த திறமையையும் வளர்த்துக் கொள்ளலாம். முறையான திட்டமிடலும், கடின உழைப்பும் இருந்தால் குடிமைப்பணி தேர்வுகளில் எளிதில் வெற்றி பெறலாம் என்றார்.

யுபிஎஸ்சி, டிஎன்பிஎஸ்சி தேர்வுகளை எளிதில் கையாளுவது குறித்து ‘இந்து தமிழ் திசை' முதன்மை உதவி ஆசிரியர் செல்வ புவியரசன், சங்கர் ஐஏஎஸ் அகாடமியின் மூத்த பயிற்றுநர் சந்துரு ஆகியோர் விளக்கமளித்தனர்.

இந்நிகழ்வில், ‘இந்து தமிழ் திசை' நாளிதழின் பொது மேலாளர்கள் டி.ராஜ்குமார் (விற்பனை), எஸ்.வெங்கட் சுப்பிரமணியன் (விளம்பரம்) உள்ளிட்டோர் கலந்துகொண்டனர்.

முன்னதாக, ஸ்ரீமதி இந்திராகாந்தி மகளிர் கல்லூரி தலைமை செயல் அலுவலர் கு.சந்திரசேகரன் வரவேற்றார். நிகழ்ச்சியை ‘இந்து தமிழ் திசை' முதுநிலை உதவி ஆசிரியர் மு.முருகேசன் ஒருங்கிணைத்தார். இந்நிகழ்ச்சியில், பள்ளி மற்றும் கல்லூரி மாணவ, மாணவிகள் அதிகளவில் பங்கேற்றனர்.

‘கிராமப்புற மாணவர்களுக்கு நல்ல வாய்ப்பு’

குளித்தலை க.கலைவாணி: திட்டமிடலின் அவசியம் குறித்து நன்றாக விளக்கினர். என்னைப்போல கிராமத்திலிருந்து வந்தவர்களுக்கு நல்வாய்ப்பை ஏற்படுத்திக் கொடுத்த ‘இந்து தமிழ் திசை' நாளிதழ், சங்கர் ஐஏஎஸ் அகாடமிக்கு நன்றி.

‘நேர மேலாண்மையை அறிந்து கொண்டேன்'

திருச்சி சொ.ராஜேஷ்: யுபிஎஸ்சி தேர்வுக்கு ஓராண்டாக தயாராகி வருகிறேன். தேர்வில் வெற்றி பெற நேர மேலாண்மை முக்கியம் என்பதை இந்நிகழ்ச்சி மூலம் அறிந்து கொண்டேன்.

‘தேர்வுக்கு தயாராக பேருதவியாக இருந்தது'

பெரம்பலூர் ஆர்.எல்.நித்யஸ்ரீ: டிஎன்பிஎஸ்சி தேர்வு எழுத விண்ணப்பித்துள்ளேன். தேர்வுக்கு தயாராக இந்நிகழ்ச்சி பேருதவியாக இருந்தது. யுபிஎஸ்சி தேர்வுகள் குறித்தும் தெளிவாக தெரிந்து கொள்ள முடிந்தது.

‘தன்னம்பிக்கை ஏற்படுத்திய நிகழ்ச்சி’

தென்காசி வெ.கலைச்செல்வன்: போட்டித் தேர்வுகளை கையாளும் விதம் குறித்து எங்களுக்கு புரியும் வகையில் தமிழில் எளிமையாக விளக்கினர். என்னாலும் வெற்றி பெற முடியும் என்ற தன்னம் பிக்கையை இந்நிகழ்ச்சி ஏற்படுத்தியுள்ளது.