கால்நடை மருத்துவ படிப்புகளுக்கு 22,525 பேர் ஆன்லைனில் விண்ணப்பம்

சென்னை: தமிழ்நாடு கால்நடை மருத்துவ அறிவியல் பல்கலைக்கழகத்தின் கீழ் உள்ள கால்நடை மருத்துவக் கல்லூரிகள், உணவு மற்றும் பால்வளத் தொழில்நுட்பக் கல்லூரி, கோழியின உற்பத்தி மற்றும் மேலாண்மைக் கல்லூரி ஆகியவற்றில் பி.வி.எஸ்சி. - ஏ.ஹெச். மற்றும் பி.டெக். படிப்புகளுக்கு 2023-24-ம் ஆண்டு மாணவர் சேர்க்கைக்கு https://adm.tanuvas.ac.in/ என்ற இணையதளத்தில் விண்ணப்பிப்பது கடந்த 12-ம் தேதி காலை 10 மணிக்கு தொடங்கியது.

நேற்று மாலை 5 மணியுடன் விண்ணப்பிப்பது நிறைவடைந்தது. இந்த படிப்புகளுக்கு பிளஸ்-2 மதிப்பெண் அடிப்படையில் மாணவர் சேர்க்கை நடைபெறவுள்ளதால், மாணவ, மாணவிகள் ஆர்வமாக ஆன்லைனில் விண்ணப்பித்தனர். பி.வி.எஸ்சி. - ஏ.ஹெச். படிப்புக்கு 18,746 பேரும், பி.டெக். படிப்புக்கு 3,779 பேரும் என மொத்தம் 22,525 பேர் விண்ணப்பித்துள்ளனர்.

தரவரிசைப் பட்டியல்: கடந்த ஆண்டைவிட நடப்பாண்டில் விண்ணப்பித்தவர்களின் எண்ணிக்கை சுமார் 20 சதவீதம்அதிகரித்துள்ளது. ஜூலை 1-ம் தேதி முதல் 4-ம் தேதிக்குள் விண்ணப்பங்களில் திருத்தம் இருந்தால் அவற்றை இணையதளம் மூலமாகவே செய்யலாம். ஜூலை 3-வது வாரத்தில் தரவரிசைப் பட்டியல் வெளியிடப்படவுள்ளது. ஆகஸ்ட் முதல் வாரத்தில் கலந்தாய்வு தொடங்குகிறது. சிறப்புக் கலந்தாய்வு, 7.5 சதவீத கலந்தாய்வு மற்றும் பி.டெக் படிப்புகளுக்கான கலந்தாய்வு மட்டும் நேரடியாக நடைபெறும். மற்ற அனைத்து இடங்களிலும் ஆன்லைன் மூலம் கலந்தாய்வு நடக்கவுள்ளது.