எலன் இயக்கத்தில் இணையும் ஹரீஷ் கல்யாண் - ரைசா

எலன் இயக்கத்தில் உருவாகும் புதிய படத்தில் 'பிக் பாஸ்' போட்டியாளர்கள் ஹரீஷ் கல்யாண் மற்றும் ரைசா இணைந்து நடிக்கவுள்ளார்கள்

விஜய் தொலைக்காட்சியில் ஒளிபரப்பான 'பிக் பாஸ்' நிகழ்ச்சி மக்களிடையே பெரும் வரவேற்பைப் பெற்றது. அந்நிகழ்ச்சியில் பங்கேற்ற போட்டியாளர்கள் அனைவரைப் பற்றியும் மக்களிடையே விவாதிக்கப்பட்டன.

அப்போட்டியாளர்களில் நடிகர் ஹரீஷ் மற்றும் ரைசா இருவரும் இணைந்து படமொன்றில் நடிக்க ஒப்பந்தமாகியுள்ளார்கள். இப்படத்தை எலன் இயக்கவுள்ளார். இவருடைய இயக்கத்தில் கிருஷ்ணா நடித்திருக்கும் 'கிரகணம்' விரைவில் வெளியாகவுள்ளது.

காமெடி கலந்த காதல் கதையாக உருவாகவுள்ள இப்படத்துக்கு யுவன் இசையமைக்கவுள்ளார். நவம்பர் 5-ம் தேதி இப்படத்தின் தலைப்புடன் கூடிய ஃபர்ஸ்ட் லுக் போஸ்டரை வெளியிட படக்குழு தீர்மானித்துள்ளது.

மேலும், 'பிக் பாஸ்' சீசன் 1 வெற்றியாளரான ஆரவ்வும் நாயகனாக நடிக்கவுள்ளார். இப்படத்தை 'சிலம்பாட்டம்' சரவணன் இயக்கவுள்ளார். இது குறித்த அதிகாரப்பூர்வ அறிவிப்பு விரைவில் வெளியாகவுள்ளது.