சிம்பு என் காட்ஃபாதர்: சந்தானம் நெகிழ்ச்சி

சிம்பு என் காட்ஃபாதர் என்று 'சக்க போடு போடு ராஜா' படத்தின் ட்ரெய்லர் வெளியீட்டு விழாவில் சந்தானம் நெகிழ்ச்சியுடன் குறிப்பிட்டார்

சேதுராமன் இயக்கத்தில் சந்தானம், வைபவி, விடிவி கணேஷ், விவேக், சம்பத் உள்ளிட்ட பலர் நடிப்பில் உருவாகியுள்ள படம் 'சக்க போடு போடு ராஜா'. சிம்பு இசையமைப்பாளராக அறிமுகமாகும் இப்படத்தை விடிவி கணேஷ் தயாரித்திருக்கிறார். இப்படத்தின் ட்ரெய்லர் வெளியீட்டு விழா சென்னையில் நடைபெற்றது. இவ்விழாவில் ஆர்யா, இயக்குநர் ராஜேஷ் ஆகியோருடன் படக்குழுவினர் கலந்து கொண்டார்கள்.

இவ்விழாவில் சந்தானம் பேசியதாவது:

"பாடல்களுக்கு இந்தளவுக்கு பெரிய ரீச் கிடைத்திருக்கிறது என்றால் அதற்கு காரணம் சிம்பு தான். நானும் இந்த இடத்துக்கு வந்திருப்பதற்குக் காரணம் சிம்பு தான்.

இப்படத்தின் இசையமைப்பாளராக முதலில் ஹாரிஸ் சாரைத் தான் பார்த்தோம். அப்போது அவர் மிகவும் பிஸியாக இருந்தார். விடிவி கணேஷ் தான் "சிம்புவைக் கேட்கலாமா?" என்றார். அவர் நாயகனாக நடித்துக் கொண்டிருக்கும் போது, இசையமைப்பாரா என்று சந்தேகம் இருந்தது. உனக்கென்றால் கண்டிப்பாக சிம்பு செய்வார் என்று விடிவி கூறினார்.

நான் அவர் மீது மிகுந்த அன்பு வைத்திருக்கிறேன். ஆனால், அவர் என் மீது இவ்வளவு அன்பு வைத்திருப்பார் என்று நினைத்துப் பார்க்கவில்லை. படப்பிடிப்பில் இருக்கும் போது "உன் படத்துக்கு யார் இசையமைப்பாளர் தெரியுமா?" என்று சிம்பு கேட்டார். தெரியவில்லை என்றவுடன் மெசேஜில் "A STR MUSICAL" என்று அனுப்பினார். பயங்கர சந்தோஷப்பட்டேன். இரவு பகலாக பணிபுரிந்து அவ்வளவு அற்புதமாக பாடல்கள் கொடுத்திருக்கிறார்.

சிம்பு மீது பலருக்கும் கோபங்கள், வருத்தங்கள் இருக்கலாம். என்னைப் பொறுத்தவரைக்கும் அவர் எனக்கு காட்ஃபாதர். எப்போதுமே எனக்கு பக்கபலமாக இருந்திருக்கிறார். அவருக்கு இறுதிவரை நன்றியுள்ளவனாக இருப்பேன்"

இவ்வாறு சந்தானம் பேசினார்.