இளைஞர்கள் மத்தியில் சிம்பு என்றாலே ஓர் ஈர்ப்பு இருக்கிறது: விவேக்

இளைஞர்கள் மத்தியில் சிம்பு என்றாலே ஓர் ஈர்ப்பு இருக்கிறது என்று 'சக்க போடு போடு ராஜா' ட்ரெய்லர் வெளியீட்டு விழாவில் விவேக் தெரிவித்தார்.

சேதுராமன் இயக்கத்தில் சந்தானம், வைபவி, விடிவி கணேஷ், விவேக், சம்பத் உள்ளிட்ட பலர் நடிப்பில் உருவாகியுள்ள படம் 'சக்க போடு போடு ராஜா'. சிம்பு இசையமைப்பாளராக அறிமுகமாகும் இப்படத்தை விடிவி கணேஷ் தயாரித்திருக்கிறார். இப்படத்தின் ட்ரெய்லர் வெளியீட்டு விழா சென்னையில் நடைபெற்றது. இவ்விழாவில் ஆர்யா, இயக்குநர் ராஜேஷ் ஆகியோருடன் படக்குழுவினர் கலந்து கொண்டார்கள்.

இவ்விழாவில் விவேக் பேசியதாவது:

இரவு 12 மணிக்கு தொலைபேசியில் அழைத்து, "அண்ணா.. இ-மெயிலில் பாடல் ஒன்றை அனுப்பியுள்ளேன். கேட்டுவிட்டு உங்கள் அபிப்ராயத்தைச் சொல்லுங்கள்" என்றார் சிம்பு. காலையில் கேட்டுக் கொள்ளலாம் என்று தூங்கிவிட்டேன். அடுத்த 5 நிமிடத்தில் அழைத்து "அண்ணா.. கேட்டு விட்டீர்களா?" என்றார். அதனைத் தொடர்ந்து அப்பாடலைக் கேட்டேன், நன்றாக இருந்தது. அந்த சமயத்தில் என் மகளும் கேட்டுவிட்டு, ரொம்ப நல்லாயிருக்கு என்று சொல்லுங்கள் அப்பா என்றார்.

தனது வாழ்க்கையில் எவ்வளவு ஏற்ற, இறக்கங்களைப் பார்த்திருந்தாலும், இளைஞர்கள் மத்தியில் சிம்பு என்றாலே ஓர் ஈர்ப்பு இருக்கிறது. அந்த கூட்டம் தானாக சேர்ந்த கூட்டம். சிம்பு அந்த இளைஞர்கள் கூட்டத்தை காப்பாற்றிக் கொள்ள வேண்டும். ரசிகர்கள் இதயத்தில் அப்படியொரு இடம் கிடைப்பது கடினம். அதை உழைத்து தக்க வைக்க வேண்டும். ஏனென்றால் ரசிகர்கள் அவரை மேலே உயர்த்த தயாராக இருக்கிறார்கள். அவருக்கும் அதற்கான தகுதி இருக்கிறது. நடனம், இசை, பாடல் வரிகள், சண்டை, ஒளிப்பதிவு, இயக்கம் என அனைத்துமே தெரிந்தவர் சிம்பு. அதை வீணடிக்கக் கூடாது.

இவ்வாறு விவேக் பேசினார்.