ஆர்.கண்ணன் இயக்கத்தில் அதர்வா

ஆர்.கண்ணன் இயக்கத்தில் அதர்வா நடிக்கவுள்ள படத்தின் படப்பிடிப்பு ஜனவரியில் தொடங்கவுள்ளது.

ஆர்.கண்ணன் இயக்கத்தில் கவுதம் கார்த்திக், ஆர்.ஜே.பாலாஜி, ஷ்ரத்தா ஸ்ரீநாத் உள்ளிட்ட பலர் நடிப்பில் வெளியான படம் 'இவன் தந்திரன்'. விமர்சன ரீதியாக நல்ல வரவேற்பைப் பெற்ற இப்படம் தெலுங்கில் ரீமேக்காக உள்ளது.

இதற்கிடையே தமிழில் தனது அடுத்தப் படத்துக்குத் தயாராகிவிட்டார் ஆர்.கண்ணன். அவரது 'மசாலா பிக்ஸ்' நிறுவனமும், எம்.கே.ஆர்.பி நிறுவனமும் இணைந்து தயாரிக்கவுள்ளன. அதர்வா நாயகனாக நடிக்கவுள்ள இப்படத்துக்கு 'அர்ஜுன் ரெட்டி' இசையமைப்பாளர் ரதன் இசையமைக்கவுள்ளார்.

இப்படம் குறித்து ஆர்.கண்ணன், "மிக விறுவிறுப்பான சுவாரஸ்யமான கதை. அனைத்து கமர்ஷியல் விஷயங்களும் கலந்த ஆக்‌ஷன் கதையாக உருவாக்கவுள்ளேன். நாயகனாக இக்கதைக்கு அதர்வா மட்டுமே பொருத்தமாக இருப்பார். கதாநாயகி மற்றும் மற்ற துணை கதாபாத்திரங்களுக்கான தேர்வு நடைபெற்று வருகிறது. ஜனவரியில் படப்பிடிப்பு தொடங்கி கோடை விடுமுறைக்கு வெளியிடத் திட்டமிட்டு இருக்கிறோம்" என்று தெரிவித்தார்.