பொங்கலுக்கு வெளியாகிறது தானா சேர்ந்த கூட்டம்

விக்னேஷ் சிவன் இயக்கத்தில் சூர்யா நடித்துவரும் 'தானா சேர்ந்த கூட்டம்' திரைப்படம் பொங்கலுக்கு வெளியாகும் என படக்குழு அறிவித்திருக்கிறது.

'தானா சேர்ந்த கூட்டம்' படத்தின் படப்பிடிப்பு, பெப்சி தொழிலாளர்களின் வேலைநிறுத்தத்தால் தடைபட்டது. தற்போது செப்டம்பர் 25-ம் தேதி முதல் இறுதிக்கட்டப் படப்பிடிப்பைத் தொடங்க படக்குழு முடிவு செய்துள்ளது.

எப்போது வெளியீடு என்ற தகவலை வெளியிடாமல், படப்பிடிப்பில் முழுமையாக கவனம் செலுத்தி வந்தார்கள். தற்போது இறுதிக்கட்டத்தை எட்டியிருப்பதால், பொங்கல் வெளியீடு என்று அதிகாரபூர்வமாக அறிவித்திருக்கிறது படக்குழு.

மேலும், அக்டோபரில் 2-வது பாடல், நவம்பரில் டீஸர், டிசம்பரில் முழுப் பாடல்கள் மற்றும் ட்ரெய்லர் ஆகியவை வெளியிடப்படும் என்றும் படக்குழு தெரிவித்திருக்கிறது.

விக்னேஷ் சிவன் இயக்கத்தில் உருவாகியிருக்கும் இப்படத்தில் சூர்யா, கீர்த்தி சுரேஷ், செந்தில், கார்த்திக், ரம்யா கிருஷ்ணன், சுரேஷ் மேனன், ஆர்.ஜே.பாலாஜி உள்ளிட்ட பலர் நடித்து வருகிறார்கள். தினேஷ் கிருஷ்ணன் ஒளிப்பதிவு செய்து வரும் இப்படத்துக்கு அனிருத் இசையமைத்து வருகிறார். ஸ்டூடியோ க்ரீன் நிறுவனம் தயாரித்து வருகிறது.