ஜி.வி.பிரகாஷின் 100% காதல் ஃபர்ஸ்ட் லுக் வெளியீடு

'100% லவ்' தமிழ் ரீமேக்கான '100% காதல்' படத்தின் ஃபர்ஸ்ட் லுக்கை வெளியிட்டுள்ளது படக்குழு.

தெலுங்கில் பெரும் வரவேற்பைப் பெற்ற '100% லவ்' படத்தின் தமிழ் ரீமேக்கில் நாயகனாக நடிக்கவுள்ளார் ஜி.வி.பிரகாஷ். இதன் முதற்கட்ட பணிகள் தீவிரமாக நடைபெற்று வந்தது.

லாவண்யா திரிபாதிக்கு பதிலாக 'அர்ஜுன் ரெட்டி' படத்தின் நாயகி ஷாலினி பாண்டே நாயகியாக ஒப்பந்தம் செய்யப்பட்டுள்ளார். இதன் ஃபர்ஸ்ட் லுக் போஸ்டரை படக்குழு வெளியிட்டுள்ளது. அக்டோபர் 11-ம் தேதி முதல் படப்பிடிப்பு தொடங்கப்படவுள்ளதாகவும், 2018 கோடை விடுமுறைக்கு படம் வெளியாகும் எனவும் படக்குழு அறிவித்துள்ளது.

இயக்குநர் சுகுமார் தயாரிக்கவுள்ள இப்படத்தில் நாயகனாக நடித்து, இசையமைக்கவுள்ளார் ஜி.வி.பிரகாஷ். எம்.எம். சந்திரமெளலி இப்படத்தின் மூலம் இயக்குநராக அறிமுகமாக இருக்கிறார். ஒளிப்பதிவாளராக டட்லி ஒப்பந்தம் செய்யப்பட்டுள்ளார்.

சுகுமார் இயக்கத்தில் நாக சைதன்யா, தமன்னா உள்ளிட்ட பலர் நடிப்பில் வெளியான படம் '100% லவ்'. 2011-ம் ஆண்டு வெளியாகி பெரும் வரவேற்பைப் பெற்ற இப்படத்தை கீதா ஆர்ட்ஸ் நிறுவனம் தயாரித்து வெளியிட்டது. சுகுமார் இயக்கியிருந்தார்.