சங்கமித்ராவுக்கு முன் கலகலப்பு 2: இயக்குநர் சுந்தர்.சி திட்டம்

'சங்கமித்ரா' படத்துக்கு முன்பாக 'கலகலப்பு 2' படத்தை இயக்க சுந்தர்.சி முடிவு செய்திருக்கிறார்.

தேனாண்டாள் பிலிம்ஸ் பெரும் பொருட்செலவில் உருவாக்கவுள்ள 'சங்கமித்ரா' படத்தின் முதற்கட்ட பணிகள் தொடங்கி நடைபெற்று வருகிறது. ஜெயம் ரவி, ஆர்யா உள்ளிட்ட பலர் நடிக்கவுள்ள இப்படத்தின் படப்பிடிப்பு அடுத்தாண்டு ஜூன் மாதத்தில் தொடங்கும் என தெரிகிறது.

இதற்கிடையே 'கலகலப்பு 2' படத்தை இயக்க சுந்தர்.சி முடிவு செய்திருக்கிறார். ஜீவா, ஜெய், நிக்கி கல்ரானி ஆகியோர் நடிக்க ஒப்பந்தம் செய்யப்பட்டு இருக்கிறார்கள். மற்றொரு நாயகியாக ஓவியா அல்லது கத்ரீன் தெரசா நடிக்க வாய்ப்புகள் உள்ளது என்று செய்திகள் வெளியாகியுள்ளன. இதர படக்குழுவினர் தேர்வு மும்முரமாக நடைபெற்று வருகிறது.

2012-ம் ஆண்டில் சுந்தர்.சி இயக்கத்தில் வெளியான படம் 'கலகலப்பு'. முழுக்க காமெடிக்கு முக்கியத்துவம் கொடுத்து வெளியான இப்படம் வசூல் ரீதியில் பெரும் வரவேற்பைப் பெற்றது. அதே போன்று 'கலகலப்பு 2' படத்தையும் உருவாக்க முடிவு செய்திருக்கிறார் சுந்தர்.சி

'கலகலப்பு 2' படத்தை குறைந்த நாட்களில் முடித்துவிட்டு, 'சங்கமித்ரா' படப்பணிகளில் கவனம் செலுத்தவுள்ளார் இயக்குநர் சுந்தர்.சி.