சிவாஜி கணேசன் மணிமண்டபம் திறப்பு விழாவில் சங்க உறுப்பினர்கள் கலந்து கொள்ள நடிகர் சங்கம் அழைப்பு

சிவாஜி கணேசன் மணிமண்டபம் திறப்பு விழாவில், நடிகர் சங்க உறுப்பினர்கள் கலந்து கொள்ள வேண்டும் என்று நடிகர் சங்கம் அழைப்பு விடுத்துள்ளது.

சென்னை அடையாறில் நடிகர் சிவாஜி கணேசனுக்கு தமிழக அரசு சார்பில் ரூ.2.80 கோடி செலவில் மணிமண்டபம் கட்டப்பட்டுள்ளது.

சிவாஜியின் பிறந்தநாளான அக்டோபர் 1-ம் தேதி மணிமண்டபத்தை துணை முதல்வர் ஓ.பன்னீர்செல்வம் திறந்து வைக்கவுள்ளார். இவ்விழாவில் நடிகர் சங்க உறுப்பினர்கள் கலந்து கொள்ளுமாறு நடிகர் சங்கம் கேட்டுக் கொண்டுள்ளது.

இது தொடர்பாக நடிகர் சங்கம் விடுத்துள்ள அறிக்கையில் கூறியிருப்பதாவது:

நமது தென்னிந்திய நடிகர் சங்கத்தின் வேண்டுகோளுக்கிணங்க வரும் அக்டோபர் 1-ம் தேதி ஞாயிறு காலை 10.30 மணி அளவில் சென்னை அடையாரில் நடைபெறும் 'செவாலியே' சிவாஜி கணேசன் மணிமண்டபம் திறப்பு விழாவில் துணை முதல்வர் பன்னீர் செல்வம் கலந்து கொள்கிறார்கள் என்பதை அறிந்து மகிழ்ச்சி அடைகிறோம். இதற்காக தென்னிந்திய நடிகர் சங்கத்தின் சார்பில் தமிழக அரசுக்கு நன்றியை தெரிவித்துக் கொள்கிறோம். மேலும் இவ்விழாவில் சங்க உறுப்பினர்கள் அனைவரும் தவறாமல் கலந்து கொண்டு விழாவினை சிறப்பிக்குமாறு வேண்டுகிறோம்.

இவ்வாறு அறிவிக்கையில் தெரிவிக்கப்பட்டுள்ளது.