’மாரி 2’ அப்டேட்: வில்லனாக டோவினோ தாமஸ் ஒப்பந்தம்

தனுஷ் நடிக்கவுள்ள 'மாரி 2' படத்தின் வில்லனாக டோவினோ தாமஸ் ஒப்பந்தம் செய்யப்பட்டு இருக்கிறார்.

வெற்றிமாறன் இயக்கத்தில் உருவாகும் 'வடசென்னை' படத்தில் கவனம் செலுத்தி வருகிறார் தனுஷ். அதனைத் தொடர்ந்து 'மாரி 2' படப்பணிகளில் கவனம் செலுத்த முடிவு செய்திருக்கிறார் தனுஷ்.

அக்டோபரில் தொடங்கும் 'மாரி 2' படத்தை பாலாஜி மோகன் இயக்க, தனுஷ் தயாரிக்கவுள்ளார். ஒளிப்பதிவாளராக ஓம்பிரகாஷ், முதற்பாகத்தின் கதாபாத்திரம் போலவே ரோபோ ஷங்கர் ஆகியோர் ஒப்பந்தம் செய்யப்பட்டுள்ளார்கள்.

இப்படத்தின் வில்லனாக மலையாள திரையுலகின் முன்னணி நடிகரான டோவினோ தாமஸ் ஒப்பந்தம் செய்யப்பட்டுள்ளார். முன்னதாக, தனுஷ் தயாரித்திருக்கும் மலையாள படமான 'தாரங்கம்' படத்தில் நாயகனாக நடித்துள்ளார் டோவினோ தாமஸ் என்பது குறிப்பிடத்தக்கது.

நாயகி, இசையமைப்பாளர் மற்றும் இதர கதாபாத்திரங்களை முடிவு செய்வதில் படக்குழு தீவிரமாக இறங்கியுள்ளது. மேலும், படப்பிடிப்புக்கான இடங்களைத் தேர்வு செய்யும் பணியிலும் இயக்குநர் பாலாஜி மோகன் ஈடுபட்டு வருகிறார்.