பிக் பாஸ் நிகழ்ச்சியின் 100-வது நாள் நிகழ்வு: கலந்து கொள்வாரா ஓவியா?

'பிக் பாஸ்' நிகழ்ச்சியின் 100-வது நாள் நிகழ்வில், ஓவியா கலந்து கொள்வாரா என்று கேள்வி தற்போது எழுந்துள்ளது.

'பிக் பாஸ்' நிகழ்ச்சியின் 100-வது நிகழ்வு செப்டம்பர் 30-ம் தேதி நடைபெற இருக்கிறது. இந்நிகழ்ச்சியின் போது 'பிக் பாஸ்' வீட்டிலிருந்து வெளியேறிய ஸ்ரீ, அனுயா, கஞ்சா கருப்பு, பரணி, ஜூலி, காயத்ரி ரகுராம், வையாபுரி உள்ளிட்ட அனைவருமே கலந்து கொள்ள இருக்கிறார்கள்.

அன்றைய தினத்தில் 'பிக் பாஸ்' சீசன் 1- நிகழ்ச்சியின் வெற்றியாளர் யார் என்று அறிவிக்கப்படவுள்ளது. இறுதிநாள் நிகழ்ச்சியில் ஓவியா கலந்து கொள்வாரா என்பது கேள்விக்குறியாகி உள்ளது.

தற்போது வெளிநாட்டுக்கு சென்றிருக்கும் ஓவியா, எப்போது சென்னை திரும்பவுள்ளார் என்ற எந்த ஒரு தகவலுமே வெளியாகவில்லை. மேலும், தனது ட்விட்டர் பக்கத்தில் "பலரும் எப்போது கலந்துரையாடுவீர்கள் என்று கேள்வி கேட்டு வருகிறீர்கள். பிக் பாஸ் நிகழ்ச்சி 100 நாள் முடிந்தவுடன் கலந்துரையாடலாம்" என்று தெரிவித்திருக்கிறார் ஓவியா

'பிக் பாஸ்' நிகழ்ச்சியிலிருந்து வெளியேறிய உடன், அந்நிகழ்ச்சியை பற்றி பேசுவதை தவிர்த்து வந்தார் ஓவியா. ஒரே ஒரு வீடியோ பதிவில் தன்னைப் பற்றி எழுந்துள்ள கேள்விகள் அனைத்திற்குமே பதிலளித்துவிட்டு அமைதியாக ஓய்வெடுத்து வந்தார்.

தற்போது பல்வேறு பட வாய்ப்புகளும், விளம்பர வாய்ப்புகளும் வருவதால் மும்முரமாக பணிபுரிந்து வருகிறார் ஓவியா. இதனால் 'பிக் பாஸ்' நிகழ்ச்சியில் அவர் கலந்து கொள்வது என்பது சாத்தியமில்லை என்று அவருக்கு நெருக்கமானவர்கள் தெரிவித்தார்கள்.