மெர்சல் படத்துக்கு தமிழ் ராக்கர்ஸ் மிரட்டல்: அதிர்ச்சியில் தமிழ் திரையுலகம்

'மெர்சல்' படம் குறித்த 'தமிழ் ராக்கர்ஸ்' பதிவால் தமிழ் திரையுலகம் பெரும் அதிர்ச்சியில் இருக்கிறது.

அட்லீ இயக்கத்தில் விஜய் நடித்திருக்கும் 'மெர்சல்' படத்தின் இறுதிகட்ட பணிகளில் படக்குழு தீவிரமாக பணியாற்றி வருகிறது. தங்களது 100வது தயாரிப்பு என்பதால் பெரும் பொருட்செலவில் இப்படத்தை உருவாக்கியுள்ளது தேனாண்டாள் பிலிம்ஸ் நிறுவனம்.

சமீபத்தில் வெளியிடப்பட்ட 'மெர்சல்' படத்தின் டீஸருக்கு, இணையத்தில் பெரும் வரவேற்பு கிடைத்திருக்கிறது. தீபாவளிக்கு வெளியாகும் என படக்குழு அதிகாரப்பூர்வமாக அறிவித்துள்ளது குறிப்பிடத்தக்கது.

இந்நிலையில், "'மெர்சல்' வெளியாகும் நாளிலேயே, அப்படத்தை வெளியிடுவோம். ஆதரவு தாருங்கள்" என்று 'தமிழ் ராக்கர்ஸ்' தங்களுடைய ட்விட்டர் பக்கத்தில் குறிப்பிட்டுள்ளார்கள். இதனால் படக்குழு மட்டுமன்றி தமிழ் திரையுலகினர் பெரும் அதிர்ச்சியடைந்தார்கள்.

பெரும் பொருட்செலவில் உருவாகியுள்ள படம் என்பதால், தயாரிப்பு நிறுவனம் துரிதமாக செயல்பட்டு 'மெர்சல்' படத்தைப் பற்றி ட்வீட் செய்த ட்விட்டர் பக்கத்தை முடக்கியது. இதனால் தற்போது வேறொரு ட்விட்டர் பக்கத்தை ஆரம்பித்திருக்கிறது 'தமிழ் ராக்கர்ஸ்' இணையம். மேலும், 'மெர்சல்' படக்குழுவும் இதனை தடுப்பது குறித்து குழுவை அமைத்து துரிதமாக செயல்பட்டு வருகிறார்கள்.