அறிவழகன் இயக்கத்தில் நயன்தாரா

அறிவழகன் இயக்கத்தில் உருவாகவுள்ள புதிய படத்தில் நயன்தாரா நடிப்பது உறுதியாகி இருக்கிறது.

'குற்றம் 23' படத்தைத் தொடர்ந்து, தனது அடுத்த படத்துக்கான கதை விவாதத்தில் ஈடுபட்டு வந்தார் இயக்குநர் அறிவழகன். முழுக்க பெண்ணை மையப்படுத்தி அக்கதையை அமைத்திருப்பதால், அதற்கு ஏற்றவாறு நடிகர்கள் தேர்வு நடைபெற்று வந்தது.

இதனிடையே மஞ்சு வாரியார் நடிக்கவுள்ளதாக செய்திகள் வெளியாகின. அதனை அறிவழகன் உறுதிப்படுத்தவில்லை. மேலும், ஜி.வி.பிரகாஷ் நடிக்கவுள்ள புதிய படத்தை இயக்கவிருப்பதாகவும் செய்திகள் வெளியாகின.

இந்நிலையில், நாயகியை மையப்படுத்தி அறிவழகன் இயக்கவுள்ள சைக்காலஜி த்ரில்லர் கதையில் நயன்தாரா நடிப்பது உறுதியாகியுள்ளது. இப்படத்தை எஸ்.பி சினிமாஸ் தயாரிக்கவுள்ளது. இதற்கான ஒப்பந்தங்கள் கையெழுத்து நேற்று (செப்டம்பர் 22) முடிவுற்றது.

இந்தாண்டு இறுதிக்குள் படப்பிடிப்பைத் தொடங்க முடிவு செய்துள்ளது. தற்போது நயன்தாராவுடன் நடிக்கவிருப்பவர்கள் தேர்வு மும்முரமாக நடைபெற்று வருகிறது.