முதல்நாளில் ரஜினியின் பாபா ரீ-ரிலீஸ் வசூல் ரூ.1.4 கோடி

ரஜினியின் ‘பாபா’ படம் 20 ஆண்டுகளுக்குப்பிறகு மீண்டும் வெளியிடப்பட்ட நிலையில், முதல் நாள் ரூ.1.4கோடியை வசூலித்துள்ளதாக தகவல் வெளியாகியுள்ளது.

ரஜினி நடித்த ‘பாபா’ படத்தின் மறு வெளியீட்டுக்கான ட்ரெய்லர் வெளியாகியுள்ளது. கடந்த 2002-ம் ஆண்டு ரஜினிகாந்த் நடிப்பில் வெளியான படம் ‘பாபா’. இந்தப் படத்திற்கு கதை, திரைக்கதை எழுதியதுடன் ரஜினிகாந்தே படத்தை தயாரித்தும் இருந்தார். ‘அண்ணாமலை’, ‘வீரா’, ‘பாட்ஷா’ படங்களின் தொடர் வெற்றிக்கு பிறகு ரஜினிகாந்த் நடிப்பில் நான்காவது முறையாக ‘பாபா’ படத்தை இயக்கினார் இயக்குநர் சுரேஷ் கிருஷ்ணா. கதாநாயகியாக மனிஷா கொய்ராலா நடிக்க, முக்கிய வேடங்களில் கவுண்டமணி, டெல்லி கணேஷ், சுஜாதா, ரியாஸ்கான், எம்.என்.நம்பியார் ஆஷிஷ் வித்யார்த்தி, சாயாஜி ஷிண்டே, சங்கவி, கருணாஸ் உள்ளிட்ட பலர் நடித்திருந்தனர். ஏ.ஆர்.ரஹ்மான் இந்தப் படத்திற்கு இசையமைத்திருந்தார்.

தற்போது இந்தப் படம் மீண்டும் புதுப்பொலிவுடன் புதிய திரையிடலுக்கு தயாராகி உள்ளது. இதற்காக முற்றிலும் புதிய கோணத்தில் இந்தப் படம் புதிதாக மறு படத்தொகுப்பு செய்யப்பட்டுள்ளதாம். நவீன தொழில்நுட்பத்திற்கேற்ப கலர் கிரேடிங் செய்யப்பட்டு டிஜிட்டலில் ஒவ்வொரு பிரேமும் இன்னும் மேம்படுத்தப்பட்டுள்ளதாம். மேலும் 'மாயா மாயா ', 'சக்தி கொடு', 'கிச்சு கிச்சு' என ஏ.ஆர்.ரஹ்மான் இசையில் வெளியான இந்தப் படத்தின் பாடல்கள் அனைத்தும் புதிதாகவே ரீமிக்ஸ் செய்யப்பட்டு டால்பி மிக்ஸ் ஒலி அமைப்புக்கு மாற்றப்பட்டு, படத்திற்கான சிறப்பு சப்தங்களும் கூட இன்னும் விறுவிறுப்பு கூட்டப்பட்டதாக தெரிவிக்கப்பட்டது. இந்நிலையில் படம் நேற்று திரையரங்குகளில் வெளியானது. இதில் க்ளைமாக்ஸ் காட்சிகள் மாற்றப்பட்டிருந்தது.

20 ஆண்டுகள் கழித்து மீண்டும் ரீ-ரிலீஸ் செய்யப்பட்ட இந்தப்படம் முதல் நாளான நேற்று (டிசம்பர் 10) தமிழ்நாட்டில் மட்டும் ரூ.50 லட்சத்தை வசூலித்துள்ளதாக தகவல் வெளியாகியுள்ளது. ஒட்டுமொத்தமாக படம் ரூ.1.4 கோடியை வசூலித்துள்ளதாக கூறப்படுகிறது.