ஏப்ரல் 2-ல் வெளியாகிறது உத்தம வில்லன்

ரமேஷ் அரவிந்த் இயக்கத்தில் கமல்ஹாசன் நடித்திருக்கும் 'உத்தம வில்லன்' திரைப்படம் ஏப்ரல் 2-ம் தேதி வெளியாகும் என லிங்குசாமி அறிவித்துள்ளார்.

கமல்ஹாசன், மறைந்த இயக்குநர் கே.பாலசந்தர், பூஜா குமார், ஆண்ட்ரியா, ஜெயராம், நாசர் உள்ளிட்ட பல்வேறு நட்சத்திரங்கள் நடித்திருக்கும் படம் 'உத்தம வில்லன்'. ரமேஷ் அரவிந்த் இயக்கி இருக்கும் இப்படத்திற்கு ஜிப்ரான் இசையமைத்து இருக்கிறார். திருப்பதி பிரதர்ஸ் நிறுவனம் தயாரித்திருக்கும் இப்படத்தை ஈராஸ் நிறுவனம் வெளியிட இருக்கிறது.

இப்படத்தின் படப்பிடிப்பு முடிவுற்று, இறுதிகட்ட பணிகள் தீவிரமாக நடைபெற்று வந்தது. அமெரிக்காவில் இப்படத்தின் இறுதிகட்டப் பணிகளை பார்வையிட கமல்ஹாசன் சென்றபோதுதான் இயக்குநர் கே.பாலசந்தர் மரணமடைந்தார்.

மார்ச் 1-ம் தேதி இப்படத்தின் இசை வெளியாகும் என்று சமீபத்தில் அறிவித்திருந்தார்கள். தற்போது தயாரிப்பாளர் லிங்குசாமி, ஏப்ரல் 2-ம் தேதி இப்படத்தை பிரம்மாண்டமாக வெளியிடப்படும் என்று ட்விட்டர் பக்கத்தில் தெரிவித்திருக்கிறார்.

ஏற்கெனவே ஏப்ரல் 2-ல் வெளியாக காத்திருக்கும் கார்த்திக் நடித்திருக்கும் 'கொம்பன்', உதயநிதி ஸ்டாலின் நடித்திருக்கும் 'நண்பேன்டா' ஆகிய படங்களுடன் 'உத்தம வில்லன்' படமும் இணைந்திருப்பது குறிப்பிடத்தக்கது.