காலா டீஸர் லீக்: அதிகாரப்பூர்வமாக வெளியிட்ட படக்குழு

'காலா' டீஸர் லீக்கானதைத் தொடர்ந்து, அவசரமாக அதிகாரப்பூர்வமாக டீஸரை வெளியிட்டது படக்குழு.

ரஜினி மற்றும் இயக்குநர் ரஞ்சித் ஆகியோர் கூட்டணியில் உருவாகியுள்ள படம் 'காலா'. தனுஷ் தயாரிக்க, சந்தோஷ் நாராயணன் இசையமைக்கவுள்ளார். இன்று (மார்ச் 2) காலை 10 மணிக்கு 'காலா' டீஸர் வெளியாவதாக இருந்தது.

ஆனால், நேற்றிரவு அதிகாரப்பூர்வமற்ற வடிவம் சமூகவலைத்தளத்தில் வெளியானது. இதனால் படக்குழு மிகவும் அதிர்ச்சியடைந்தது. இதனைத் தொடர்ந்து இறுதிசெய்யப்பட்ட 'காலா' டீஸரை தனுஷ் வெளியிட்டார். "தலைவர் டீஸர் எப்போ ரிலீஸ் ஆனாலும் எப்படி ரிலீஸ் ஆனாலும் தீபாவளி தான். மாஸ் தான்" என்று தனுஷ் தனது ட்வீட்டில் குறிப்பிட்டுள்ளார்.

"வேங்கையன் மவன்.. ஒத்த ஆளா நிக்கேன்.. தில்லிருந்தா மொத்தமா வாங்கலே...", "இந்த கரிகாலனோட மொத்த ரவுடிதனத்தை நீங்க பாத்ததில்லைல.. பாப்பீங்க" என்று ரஜினி பேசும் வசனங்கள் ரசிகர்களிடையே பெரும் வரவேற்பைப் பெற்றிருக்கின்றன.

சமுத்திரக்கனி, நானா படேகர், சம்பத், சாயாஜி ஷிண்டே, அருள்தாஸ், ஹூமா குரேஷி, 'வத்திக்குச்சி' திலீபன், அரவிந்த் ஆகாஷ், சுதான்ஷூ பாண்டே, ஈஸ்வரிராவ், சாக்ஷி அகர்வால் உள்ளிட்ட பலர் ரஜினியுடன் நடித்திருக்கிறார்கள். ’காலா’ திரைப்படம் ஏப்ரல் 27 ஆம் தேதி திரைக்கு வரும் என்று படக்குழு அறிவித்துள்ளது