‘இந்தியன் 2’ படத்தில் இணைந்த கபிலன் வைரமுத்து

கவிஞரும், பாடலாசிரியருமான கபிலன் வைரமுத்து, ‘இந்தியன் 2’ படத்தில் இணைந்துள்ளார்.

கமல்ஹாசன் நடிப்பில், ஷங்கர் இயக்கத்தில் ‘இந்தியன் 2’ படம் உருவாக இருக்கிறது. லைகா புரொடக்‌ஷன்ஸ் இந்தப் படத்தைத் தயாரிக்கிறது. இந்தப் படத்துக்கு எழுத்தாளர் ஜெயமோகன் வசனம் எழுதுகிறார். அவருடன் இணைந்து கபிலன் வைரமுத்துவும் வசனம் எழுத இருக்கிறார்.

கபிலன் வைரமுத்து ஏற்கெனவே ‘கவண்’ படத்தின் கதையை சுபாவோடு சேர்ந்து எழுதியிருக்கிறார். அத்துடன், திரைக்கதை மற்றும் வசனத்தையும் சுபா, கே.வி.ஆனந்த் ஆகியோரோடு சேர்ந்து எழுதியுள்ளார். மேலும், அஜித்தின் ‘விவேகம்’ படத்தின் வசனம் மற்றும் திரைக்கதையிலும் பங்காற்றியுள்ளார்.

‘மக்கள் நீதி மய்யம்’ கட்சியைத் தொடங்கியுள்ள கமல்ஹாசன், தற்போது அதை பலப்படுத்தும் முயற்சியில் தொடங்கியுள்ளார். மேலும், விஜய் டிவியில் ஒளிபரப்பாக இருக்கும் ‘பிக் பாஸ் 2’வையும் அவர் தொகுத்து வழங்க இருக்கிறார். அதன்பின்னரே ‘இந்தியன் 2’ படத்தில் நடிக்கப் போகிறார் என்கிறார்கள்.