மீண்டும் விஜய் சேதுபதிக்கு ஜோடியாகிறார் அஞ்சலி?

விஜய் சேதுபதி நடிக்க இருக்கும் புதிய படத்தில், அவருக்கு ஜோடியாக அஞ்சலி நடிக்கலாம் என்கிறார்கள்.

‘பண்ணையாரும் பத்மினியும்’ படத்தின் மூலம் இயக்குநராக அறிமுகமானவர் எஸ்.யு.அருண் குமார். அடுத்ததாக ‘சேதுபதி’ படத்தை இயக்கினார். இந்த இரண்டு படங்களிலுமே விஜய் சேதுபதி தான் ஹீரோ. மூன்றாவது முறையாகவும் விஜய் சேதுபதியை ஹீரோவாக வைத்து இயக்கப் போகிறார் அருண் குமார்.

இந்த ஆண்டு கோடையில் இந்தப் படத்தின் ஷூட்டிங் தொடங்க இருக்கிறது. தமிழகத்தின் தென் பகுதிகள் மற்றும் மலேசியாவில் ஷூட்டிங் நடைபெற இருக்கிறது. யுவன் சங்கர் ராஜா இசையமைக்கிறார்.

விஜய் சேதுபதி ஜோடியாக நடிக்க அஞ்சலியிடம் பேச்சுவார்த்தை நடைபெற்று வருகிறது. கார்த்திக் சுப்பாராஜ் இயக்கத்தில் வெளியான ‘இறைவி’ படத்தில் இருவரும் ஜோடியாக நடித்திருந்தனர். எனவே, மறுபடியும் இணைந்து நடிப்பதற்கான வாய்ப்புகள் அதிகம் இருக்கும் என்று கூறப்படுகிறது.

‘பாகுபலி 2’ படத்தை வெளியிட்ட கே புரொடக்‌ஷன்ஸ் நிறுவனம் இந்தப் படத்தைத் தயாரிக்கிறது.