தனுஷுக்கு வில்லனாக நடிக்க நவீன் சந்திரா ஒப்பந்தம்

துரை.செந்தில்குமார் இயக்கத்தில் தனுஷ் நடித்து வரும் படத்தின் வில்லனாக நவீன் சந்திரா ஒப்பந்தம் செய்யப்பட்டுள்ளார்.

'அசுரன்' மற்றும் துரை.செந்தில்குமார் இயக்கி வரும் படம் ஆகியவற்றில் கவனம் செலுத்தி வருகிறார் தனுஷ். இதில் துரை.செந்தில்குமார் படத்தின் படப்பிடிப்பு படுவேகமாக நடைபெற்று வருகிறது.

இரட்டை கதாபாத்திரத்தில் தனுஷ் நடித்து வருகிறார். இதில் அப்பாவாக வரும் தனுஷுக்கு நாயகியாக சிநேகா நடித்து வருகிறார். மகன் தனுஷுக்கு நாயகியாக நடிக்க முன்னணி நாயகிகளிடம் பேச்சுவார்த்தை நடத்தி வருகிறார்கள்.

இதில் வில்லனாக நடிக்க நவீன் சந்திராவை ஒப்பந்தம் செய்துள்ளது படக்குழு. இவர் 'பிரம்மன்', 'சரபம்', 'சிவப்பு' உள்ளிட்ட தமிழ் படங்களிலும் மற்றும் சில தெலுங்குப் படங்களிலும் நடித்தவர் என்பது குறிப்பிடத்தக்கது.

குற்றாலத்தைச் சுற்றியுள்ள பகுதிகளில் அப்பாவாக தனுஷ் நடிக்கும் காட்சிகளை படமாக்கியுள்ளது படக்குழு. விரைவில் மகன் தனுஷுக்கான காட்சிகளை படமாக்கவுள்ளனர். இந்தப் படத்துக்கு விவேக் - மெர்வின் இணைந்து இசையமைப்பாளர்களாக பணிபுரிந்து வருகிறார்கள்.