அனைத்துமே கடவுள் கையில் இருக்கு: விஸ்வாசம் வெற்றி குறித்து அஜித்

அனைத்துமே கடவுள் கையில் இருக்கு என்று 'விஸ்வாசம்' வெற்றி குறித்து அஜித் தெரிவித்துள்ளார்.

சிவா இயக்கத்தில் அஜித், நயன்தாரா, ஜெகபதி பாபு, தம்பி ராமையா, ரோபோ ஷங்கர் உள்ளிட்ட பலர் நடிப்பில் வெளியாகியுள்ள படம் 'விஸ்வாசம்'. சத்யஜோதி நிறுவனம் தயாரித்துள்ள இப்படத்துக்கு இமான் இசையமைத்துள்ளார்.

கடும் போட்டிக்கு இடையே கே.ஜே.ஆர் ஸ்டுடியோஸ் நிறுவனம், இப்படத்தை தமிழக விநியோக உரிமையைக் கைப்பற்றி வெளியிட்டது. தமிழகத்தின் வசூலில் 'பேட்ட' படத்தைத் தாண்டி 'விஸ்வாசம்' படமே முதலிடத்தில் உள்ளது. இதனால் விநியோகஸ்தர்கள் பெரும் மகிழ்ச்சியில் உள்ளனர்.

இப்படத்துக்கு கிடைத்துள்ள வரவேற்பு குறித்து தயாரிப்பாளர் சத்யஜோதி தியாகராஜன் அளித்துள்ள பேட்டியில் கூறியிருப்பதாவது:

''எடிட்டிங்கில் படத்தைப் பார்த்தவுடனே, கண்டிப்பாக வெற்றியடையும் என்று நம்பினோம். படம் வெளியானவுடன் அஜித் சாரிடம் இதை எதிர்பார்க்கவில்லை, அஜித் சாருடைய படங்களில் இது பெஸ்ட் என்று சொல்றாங்க. எங்களுக்கு ரொம்பப் பெருமையாக இருக்கிறது.

படம் வெளியான அன்று காலையில் அஜித் சாருக்கு போன் பண்ணி, ”அனைத்து ஊர்களிலிருந்து வரும் ரிப்போர்ட் ரொம்ப நல்லாயிருக்கு. ரொம்ப சந்தோஷமா இருக்கு சார். உங்களுடைய நடிப்பை ரசிகர்கள் கொண்டாடுகிறார்கள்” என்றேன்.

அதற்கு ‘அனைத்துமே கடவுள் கையில் தான் இருக்கிறது’ என்றார். அவர் ரொம்ப கடினமாக உழைக்கும் மனிதர். அவருடைய உழைப்பு படத்தில் தெரியும்''.

இவ்வாறு சத்யஜோதி தியாகராஜன் தெரிவித்துள்ளார்.