விஜய் சேதுபதியின் வளர்ச்சி: ட்விட்டரில் ட்ரெண்டாகும் புகைப்படம்

தமிழ்த் திரையுலகில் விஜய் சேதுபதியின் வளர்ச்சியைக் கூறும் புகைப்படம் ஒன்று, இணையத்தில் பயங்கர வைரலாகப் பரவி வருகிறது.

சீனு ராமசாமி இயக்கத்தில் விஜய் சேதுபதி நாயகனாக அறிமுகமான படம் ‘தென்மேற்கு பருவக்காற்று’. விமர்சன ரீதியாக இப்படத்துக்கு நல்ல வரவேற்பு கிடைத்தது. அதனைத் தொடர்ந்து 'பீட்சா', ‘நடுவுல கொஞ்சம் பக்கத்த காணோம்’, 'சூது கவ்வும்' என தொடர்ச்சியாக ஹிட் படங்கள் கொடுத்து முன்னணி நாயகனாக வளர்ந்தார்.

இப்போது 'இமைக்கா நொடிகள்', 'விக்ரம் வேதா', '96', 'செக்கச்சிவந்த வானம்' என ஹிட் படங்கள் கொடுத்து வசூல் நாயகனாகவும் தன்னை வளர்த்துக் கொண்டார். தற்போதுள்ள நடிகர்களில் அதிகப் படங்களில் ஒப்பந்தமாகி, நடித்து வருபவர் விஜய் சேதுபதி என்றால் மிகையாகாது.

இந்நிலையில், நவம்பர் 24-ம் தேதி முதல் விஜய் சேதுபதியின் வளர்ச்சி சம்பந்தப்பட்ட புகைப்படம் ஒன்று இந்திய அளவில் ட்ரெண்ட்டாகி வருகிறது. பலரும் இது தான் வளர்ச்சி என்று கொண்டாடி வருகிறார்கள்.

'தென்மேற்கு பருவக்காற்று' வெளியாவதற்கு முந்தைய நாள், இயக்குநர் கார்த்திக் சுப்பராஜ் தனது ஃபேஸ்புக் பக்கத்தில் “'தென்மேற்கு பருவக்காற்று' நாளை வெளியாகிறது. பெரிய திரையில் விஜய் சேதுபதியைக் காண ஆவலாக இருக்கிறேன். விஜய் சேதுபதிக்கு வாழ்த்துகள்” என்று பதிவிட்டு இருக்கிறார்கள்.

அப்பதிவுக்கு கீழே அருண் ப்ரியன் என்பவர் “விஜய் சேதுபதி யார்” என்று கேட்க “அவரைப் பற்றி விரைவில் உங்களுக்குத் தெரியவரும்” என்று பதிலளித்திருக்கிறார் இயக்குநர் கார்த்திக் சுப்பராஜ். இப்பதிவின் புகைப்படம் தான் தற்போதைய ட்விட்டர் ட்ரெண்டாக இருக்கிறது. இதனை விஜய் சேதுபதி ரசிகர்கள் பலரும் பகிர்ந்து, வாழ்த்து தெரிவித்து வருகிறார்கள்.

ட்விட்டரில் ட்ரெண்டாகும் புகைப்படம்:

Dswa9CmUwAAsrJTjpg100