ஒரே நாளில் வெளியாகும் சமந்தாவின் 2 படங்கள்

செப்டம்பர் 13-ம் தேதி சமந்தா நடித்திருக்கும் ‘சீமராஜா’ மற்றும் ‘யு-டர்ன்’ என 2 படங்கள் வெளியாகவுள்ளன.

பொன்.ராம் இயக்கத்தில் சிவகார்த்திகேயன், சமந்தா, சூரி, சிம்ரன், நெப்போலியன் உள்ளிட்ட பலர் நடிப்பில் உருவாகியுள்ள படம் ‘சீமராஜா’. ஆர்.டி.ராஜா தயாரித்திருக்கும் இப்படத்துக்கு இமான் இசையமைத்திருக்கிறார். செப்டம்பர் 13-ம் தேதி இப்படத்தை வெளியிட தயாரிப்பாளர் சங்கத்தின் அனுமதி பெற்றிருக்கிறார்கள்.

இந்நிலையில் பவன்குமார் இயக்கத்தில் சமந்தா நடிப்பில் உருவாகியுள்ள ‘யு-டர்ன்’ படத்தின் ஃபர்ஸ்ட் லுக்கை படக்குழு நேற்று (ஜூலை 22) வெளியிட்டது. இதனை தனது ட்விட்டர் பக்கத்தில் பகிர்ந்துள்ள சமந்தா, ‘செப்டம்பர் 13-ம் தேதி தமிழ் மற்றும் தெலுங்கு என இருமொழிகளிலும் வெளியாகும்’ என்று தெரிவித்திருக்கிறார்.

கன்னடத்தில் பெரும் வரவேற்பைப் பெற்ற ‘யு-டர்ன்’ படத்தின் தமிழ் மற்றும் தெலுங்கு ரீமேக்கை அதே பெயரிலேயே உருவாக்கியிருக்கிறார்கள். ஒரே நாளில் ‘சீமராஜா’ மற்றும் ‘யு-டர்ன்’ ஆகிய இரண்டு படங்களும் வெளியாகவுள்ளது.

முன்பாக, மே மாதத்தில் 2 நாட்கள் இடைவெளியில் சமந்தா நடித்திருந்த ‘நடிகையர் திலகம்’ மற்றும் ‘இரும்புத்திரை’ ஆகிய படங்கள் வெளியாகி இரண்டுமே வரவேற்புப் பெற்றது. தற்போது ஒரே நாளில் மீண்டும் 2 படங்கள் வெளியாகவுள்ளதால், இரண்டுமே வரவேற்பு பெறும் என்று நம்பிக்கையில் இருக்கிறது படக்குழு.