‘சுட்டுப்பிடிக்க உத்தரவு’ ஃபர்ஸ்ட் லுக் வெளியீடு

ராம்பிரகாஷ் ராயப்பா இயக்கத்தில் உருவாகி வரும் ‘சுட்டுப்பிடிக்க உத்தரவு’ படத்தின் ஃபர்ஸ்ட் லுக்கை சிவகார்த்திகேயன் தனது ட்விட்டர் பக்கத்தில் வெளியிட்டுள்ளார்.

இயக்குநர் மிஷ்கின், இயக்குநர் சுசீந்திரன் மற்றும் விக்ராந்த் மூவரும் இணைந்து நடித்து வரும் படம் ‘சுட்டுப்பிடிக்க உத்தரவு’. இப்படத்தை ராம்பிரகாஷ் ராயப்பா இயக்கியுள்ளார். கல்பதரு பிக்சர்ஸ் ராம்மோகன் இப்படத்தைத் தயாரித்து வருகிறார்.

இப்படத்தின் ஃபர்ஸ்ட் லுக் போஸ்டரை இன்று (ஜூலை 19) நடிகர் சிவகார்த்திகேயன் தனது ட்விட்டர் பக்கத்தில் வெளியிட்டு இருக்கிறார். சென்னையைச் சுற்றியுள்ள பகுதிகளில், இப்படத்தின் படப்பிடிப்பு நடத்தியுள்ளது படக்குழு. தற்போது ஒட்டுமொத்த படப்பிடிப்பும் முடிந்து, இறுதிக்கட்டப் பணிகளில் தீவிரம் காட்டி வருகிறது படக்குழு.

'சுட்டுப்பிடிக்க உத்தரவு' படத்தின் கதைக்களம் குறித்து இயக்குநர் ராம்பிரகாஷ் ராயப்பா கூறியிருப்பதாவது:

விக்ராந்த் மற்றும் சுசீந்திரன் ஆகிய இருவரும் ஒரு தனியார் செக்யூரிட்டி நிறுவனத்தில் வேலை செய்பவர்கள். ஒரு நாள் அவர்கள் பணியில் இருக்கும் பொழுதே ஒரு திகிலான 'க்ரைம்' நடக்கின்றது. இதனை விசாரிக்கும் போலீஸ் அதிகாரியாக மிஷ்கின் நடிக்கின்றார். இதற்குப் பிறகு என்ன ஆனது என்பதே இந்தக் கதை. பார்வையாளர்களை சீட்டின் நுனியில் உட்கார்ந்து விறுவிறுப்போடு பார்க்கவைக்கும் கதை இது.

இவ்வாறு அவர் தெரிவித்திருக்கிறார்.

முன்னதாக, 'தமிழுக்கு எண் ஒன்றை அழுத்தவும்', 'போக்கிரி ராஜா' ஆகிய இரு படங்களை ராம்பிரகாஷ் ராயப்பா இயக்கியிருப்பது குறிப்பிடத்தக்கது.