சிவகார்த்திகேயனுக்கு நாயகியாகும் ரகுல் ப்ரீத் சிங்?

ரவிக்குமார் இயக்கத்தில் சிவகார்த்திகேயன் நடிக்கவுள்ள படத்தின் நாயகியாக நடிக்க ரகுல் ப்ரீத் சிங்கிடம் பேச்சுவார்த்தை நடத்தியுள்ளது படக்குழு.

ரவிக்குமார் இயக்கத்தில் சிவகார்த்திகேயன் நடிக்கவுள்ள படத்தின் முதற்கட்ட பணிகள் நீண்ட நாட்களாக நடைபெற்று வருகின்றன. 24 ஏ.எம் நிறுவனம் தயாரிக்கவுள்ள இப்படத்துக்கு ஏ.ஆர்.ரஹ்மான் இசையமைப்பாளராக பணிபுரியவுள்ளார்.

இதன் நாயகியாக நடிப்பதற்கு ரகுல் ப்ரீத் சிங்கிடம் பேச்சுவார்த்தை நடத்தியுள்ளது படக்குழு. படப்பிடிப்பு தேதிகள் முடிவானவுடன், அவர் ஒப்பந்தம் செய்யப்படுவார் என்று தெரிவித்தார்கள். 2019-ல் இப்படம் வெளியாகும் எனவும் படக்குழு அறிவித்திருக்கிறது.

தற்போது பொன்.ராம் இயக்கத்தில் உருவாகும் 'சீமராஜா' படத்தில் நடித்து வருகிறார் சிவகார்த்திகேயன். அவருடன் சமந்தா, சிம்ரன், நெப்போலியன், சூரி உள்ளிட்ட பலர் நடித்து வருகிறார்கள். விநாயகர் சதுர்த்திக்கு வெளியாகும் என அறிவித்திருக்கிறது படக்குழு.