தரமணிக்கு கிடைத்த ஆதரவுக்கு நன்றி: வசந்த் ரவி

'தரமணி'க்கு கிடைத்த ஆதரவிற்கு நன்றி என்று அப்படத்தின் நாயகன் வசந்த் ரவி தெரிவித்திருக்கிறார்.

ராம் இயக்கத்தில் வசந்த் ரவி, ஆண்ட்ரியா, அஞ்சலி உள்ளிட்ட பலர் நடிப்பில் வெளியான படம் 'தரமணி'. யுவன் இசையமைத்த இப்படத்தை ஜே.எஸ்.கே நிறுவனம் தயாரித்திருந்தது. இப்படத்திற்கு விமர்சன ரீதியாக பெரும் ஆதரவு கிடைத்தது. மேலும், பலரும் 2017-ம் ஆண்டின் சிறந்த படங்களின் பட்டியலில் 'தரமணி' படத்தையும் குறிப்பிட்டிருந்தனர்.

இது தொடர்பாக அப்படத்தின் நாயகன் வசந்த் ரவி விடுத்துள்ள அறிக்கையில் கூறியிருப்பதாவது:

நான் கதையின் நாயகனாக அறிமுகமான 'தரமணி' படத்திற்கு தாங்கள் அளித்த அமோக ஆதரவிற்கு நன்றி.

'தரமணி' படத்தில் எனது நடிப்பைப் பாராட்டி முதல் படத்திலேயே ஒரு நல்ல நடிகனாக வலம் வரும் அனைத்து தகுதியும் உள்ளது என நீங்கள் கூறிய வார்த்தைகள் எனக்கு மகிழ்ச்சியும் மேலும் மேலும் நல்ல கதைகளை தேர்ந்தெடுத்து சிறந்த கதாபத்திரங்களில் நடிக்க வேண்டும் என்ற ஆவலையும் தூண்டுகிறது. பத்திரிகை மற்றும் ஊடக நண்பர்களின் இத்தகைய ஆதரவு எனது கலைப்பயணத்திற்கு ஊன்றுகோலாக அமையும் என்பதை உளமாற நம்புகிறேன்.

என் சினிமா அறிமுகத்திற்கு மிகவும் உறுதுணையாக இருந்த இயக்குநர் ராம், தயாரிப்பாளர் ஜே.சதிஷ் குமார், உடன் நடித்த நடிகர்கள், தொழில்நுட்ப கலைஞர்கள் என அனைவருக்கும் இத்தருணத்தில் மனமார்ந்த நன்றியை தெரிவித்துக்கொள்கிறேன்.

அனைவருக்கும் இனிய புத்தாண்டு மற்றும் பொங்கல் நலவாழ்த்துக்கள்.

இவ்வாறு அவர் தெரிவித்திருக்கிறார்.