தணிக்கையில் யு/ஏ: பிப்.9-ம் தேதி வெளியாகிறது கீ

காலீஸ் இயக்கத்தில் ஜீவா நடித்திருக்கும் 'கீ', பிப்ரவரி 9-ம் தேதி வெளியாகும் என படக்குழு அதிகாரப்பூர்வமாக அறிவித்திருக்கிறது.

'சங்கிலி புங்கிலி கதவ தொற' படத்தின் பணிகள் முடிவடைந்தவுடன், புதுமுக இயக்குநர் காலீஸ் இயக்கத்தில் நடிக்கத் தொடங்கினார் ஜீவா. 'கீ' எனப் பெயரிடப்பட்டுள்ள இப்படத்தில் ஜீவாவுடன் நிக்கி கல்ரானி, அனைகா, ஆர்.ஜே.பாலாஜி உள்ளிட்ட பலர் நடித்துள்ளார்கள்.

அனிஷ் ஒளிப்பதிவு செய்துள்ள இப்படத்துக்கு விஷால் சந்திரசேகர் இசையமைத்துள்ளார். மைக்கேல் ராயப்பன் தயாரித்திருக்கிறார். இப்படத்தின் அனைத்து பணிகளும் முடிவடைந்து தணிக்கைக்கு விண்ணப்பிக்கப்பட்டது. 'யு/ஏ' சான்றிதழ் கிடைக்கவே, பிப்ரவரி 9-ம் தேதி வெளியாகும் என படக்குழு அதிகாரப்பூர்வமாக அறிவித்திருக்கிறது.

'அன்பானவன் அசராதவன் அடங்காதவன்' படத்தின் தயாரிப்பாளரான மைக்கேல் ராயப்பன் தயாரித்துள்ள படமென்பதால், விநியோகஸ்தர்கள் தரப்பிலிருந்து இப்படத்தின் வெளியீட்டிற்கு சிக்கல் ஏற்பட வாய்ப்பிருக்கிறது. இதனால் விநியோகஸ்தர்களிடம் விரைவில் பேச்சுவார்த்தை நடத்த படக்குழு முடிவு செய்திருக்கிறது.