தணிக்கையில் யு: ஜனவரி 26-ம் தேதி வெளியாகிறது நிமிர்

ப்ரியதர்ஷன் இயக்கத்தில் உதயநிதி ஸ்டாலின் நடித்திருக்கும் 'நிமிர்' ஜனவரி 26-ம் தேதி வெளியாகும் என படக்குழு அறிவித்திருக்கிறது.

ப்ரியதர்ஷன் இயக்கத்தில் உதயநிதி ஸ்டாலின், இயக்குநர் மகேந்திரன், நமீதா பிரமோத், பார்வதி நாயர், சமுத்திரக்கனி, எம்.எஸ்.பாஸ்கர் உள்ளிட்ட பலர் நடித்திருக்கும் படம் 'நிமிர்'. மலையாளத்தில் பெரும் வரவேற்பைப் பெற்ற 'மகேஷிண்டே பிரதிகாரம்' படத்தின் ரீமேக்காக இப்படம் உருவாகிவுள்ளது. குற்றாலத்தை சுற்றியுள்ள பகுதிகளில் இப்படத்தை ஒரே கட்டமாக முடித்துள்ளார் இயக்குநர் ப்ரியதர்ஷன்.

தமிழ் ரீமேக்கிற்கு சமுத்திரக்கனி வசனம் எழுதியுள்ளார். தர்புகா சிவா இசையமைப்பாளராகவும், ஏகாம்பரம் ஒளிப்பதிவாளராகவும் பணிபுரிந்துள்ளார்கள். இதன் இறுதிகட்டப் பணிகள் முடிவடைந்து தணிக்கைக்கு விண்ணப்பித்தார்கள். 'யு' சான்றிதழ் கிடைக்கவே, ஜனவரி 26-ம் தேதி வெளியாகும் என படக்குழு அறிவித்திருக்கிறது.

இப்படத்தின் தமிழக வெளியீட்டு உரிமையை உதயநிதி ஸ்டாலினின் 'ரெட் ஜெயன்ட்' நிறுவனம் கைப்பற்றி இருக்கிறது. இதன் ட்ரெய்லர் இன்று (ஜனவரி 8) மாலை 6 மணிக்கு வெளியாகவுள்ளது.