மார்ச் 29-ம் தேதி வெளியாகிறது இரும்புத்திரை

மித்ரன் இயக்கத்தில் விஷால் நடித்துள்ள 'இரும்புத்திரை' மார்ச் 29-ம் தேதி வெளியாகும் என அதிகாரப்பூர்வமாக அறிவிக்கப்பட்டுள்ளது.

'இரும்புத்திரை' படத்தின் இறுதிகட்டப் பணிகள் தீவிரமாக நடைபெற்று வருகிறது. சமீபத்தில் இப்படத்தின் முதல் பிரதியைப் பார்த்த படக்குழு மிகவும் சந்தோஷத்தில் இருக்கிறது.

பொங்கல் வெளியீடு, குடியரசு தின வெளியீடு, பிப்ரவரி வெளியீடு என பல முறை வெளியீட்டு தேதி மாற்றியமைக்கப்பட்டு இருக்கிறது. சமீபத்தில் வெளியிடப்பட்ட இப்படத்தின் டீஸருக்கும் நல்ல வரவேற்பு கிடைத்திருக்கிறது.

இந்நிலையில், மார்ச் 29-ம் தேதி 'இரும்புத்திரை' வெளியாகும் என படக்குழு அதிகாரப்பூர்வமாக அறிவித்திருக்கிறது. மித்ரன் இயக்கத்தில் உருவாகிவரும் இப்படத்தில் அர்ஜுன், சமந்தா உள்ளிட்ட பலர் விஷாலுடன் நடித்திருக்கிறார்கள். யுவன் இசையமைக்க, ஜார்ஜ் வில்லியம்ஸ் ஒளிப்பதிவு செய்திருக்கிறார்.

இப்படத்தின் பணிகள் முடிவடைந்ததைத் தொடர்ந்து, லிங்குசாமி இயக்கத்தில் உருவாகும் 'சண்டக்கோழி 2' படத்தில் கவனம் செலுத்தி வருகிறார் விஷால்.