தணிக்கையில் யு/ஏ: பொங்கலுக்கு வெளியாகிறது தானா சேர்ந்த கூட்டம்

தணிக்கையில் 'யு/ஏ' சான்றிதழ் கிடைத்ததைத் தொடர்ந்து, பொங்கலுக்கு 'தானா சேர்ந்த கூட்டம்' வெளியாகும் என படக்குழு அதிகாரபூர்வமாக அறிவித்திருக்கிறது.

விக்னேஷ் சிவன் இயக்கத்தில் சூர்யா, கீர்த்தி சுரேஷ், கார்த்திக், ரம்யா கிருஷ்ணன், ஆர்.ஜே.பாலாஜி, செந்தில் உள்ளிட்ட பலர் நடிப்பில் உருவாகி இருக்கும் படம் 'தானா சேர்ந்த கூட்டம்'. அனிருத் இசையமைத்திருக்கும் இப்படத்தை ஸ்டூடியோ க்ரீன் நிறுவனம் தயாரித்திருக்கிறது.

இப்படத்தின் இறுதிக்கட்டப் பணிகள் மும்முரமாக நடைபெற்று வந்தது. அப்பணிகள் முடிவடையவே, தணிக்கைக்கு விண்ணப்பித்தது படக்குழு. இப்படத்தைப் பார்த்த தணிக்கைக் குழுவினர் 'யு/ஏ' சான்றிதழ் வழங்கினார்கள்.

தற்போது தணிக்கைப் பணிகள் முடிவடைந்ததைத் தொடர்ந்து, பொங்கல் வெளியீடு உறுதி என்று அறிவித்திருக்கிறது. படத்தை விளம்பரப்படுத்தும் பணிகளைத் தீவிரப்படுத்த தயாரிப்பு நிறுவனம் திட்டமிட்டு இருக்கிறது.