2017-ல் பெரிய நம்பிக்கையையும் தைரியத்தையும் கொடுத்திருக்கிறீர்கள்: சிவகார்த்திகேயன் நெகிழ்ச்சி

2017-ல் பெரிய நம்பிக்கையையும் தைரியத்தையும் கொடுத்திருக்கிறீர்கள் என்று சிவகார்த்திகேயன் வெளியிட்டுள்ள வீடியோ பதிவில் நெகிழ்ச்சியுடன் குறிப்பிட்டு இருக்கிறார்.

மோகன் ராஜா இயக்கத்தில் சிவகார்த்திகேயன், நயன்தாரா, ஃபகத் பாசில், சிநேகா, ரோபோ சங்கர், சதீஷ், ஆர்.ஜே.பாலாஜி உள்ளிட்ட பலர் நடிப்பில் வெளியான படம் 'வேலைக்காரன்'. அனிருத் இசையமைத்துள்ள இப்படத்தை ஆர்.டி.ராஜா தயாரித்திருக்கிறார்.

'வேலைக்காரன்' படத்திற்கு விமர்சன ரீதியிலும், வசூல் ரீதியிலும் பெரும் வரவேற்பு கிடைத்திருக்கிறது.

2018-ம் ஆண்டின் தொடக்கத்தை முன்னிட்டு தனது ட்விட்டர் பக்கத்தில் வீடியோ பதிவொன்றை வெளியிட்டு இருக்கிறார் சிவகார்த்திகேயன். அதில் அவர் பேசியிருப்பதாவது:

'வேலைக்காரன்' படத்திற்கு மிகப்பெரிய வரவேற்பு கொடுத்ததற்கு நன்றி. நல்ல விஷயத்தை உங்களிடம் கொண்டு வந்து சேர்க்க வேண்டும் என்பது தான், மொத்த படக்குழுவினருடைய ஆசை. அதை க்ளைமாக்ஸ் காட்சியில் அனைவரும் லைட் அடித்து காண்பித்த போது, நல்ல விஷயத்தை அனைவரும் ஏற்றுக் கொண்டீர்கள் என்று சந்தோஷப்பட்டேன். அதற்கும் நன்றி. திரையரங்குகளில் இப்படி நடைபெறும் என எதிர்பார்க்கவில்லை.

ஒவ்வொரு படமுமே முக்கியமான படமாகத் தான் நினைக்கிறேன். அதிலும் 'வேலைக்காரன்' படத்தில் முழுமையான சீரியஸான கதாபாத்திரத்தில் நடித்திருப்பதால் இன்னும் ஸ்பெஷல். ஒரு நடிகனாகவும், மனிதனாகவும் நிறைய மாற்றங்கள் அப்படம் என்னுள் ஏற்படுத்தியிருக்கிறது. அந்தப் படத்திற்கு அனைவரும் பெரிய வரவேற்பு கொடுத்திருக்கிறீர்கள். மிகப்பெரிய நன்றி.

என்னுடைய ரசிகர்கள், தமிழக மக்கள், மற்ற நடிகர்களின் ரசிகர்கள், நலம் விரும்பிகள், பத்திரிகை, தொலைக்காட்சி, இணையதள நண்பர்கள் அனைவருக்கும் நன்றி. நீங்கள் அனைவருமே இந்த 2017-ம் ஆண்டை சந்தோஷமாக முடித்து வைத்திருக்கிறீர்கள். அதெல்லாம் தாண்டி இன்னும் நல்ல படங்கள் பண்ணலாம், உழைக்கலாம் என்ற பெரிய நம்பிக்கையையும் தைரியத்தையும் கொடுத்திருக்கிறீர்கள். அந்த நம்பிக்கையோடு 2018-ம் ஆண்டை சந்திக்க தயாராகி வருகிறேன்.

அனைவருக்குமே வாழ்க்கையில் சவால்கள் இருக்கின்றன. அது அனைத்தையும் நம்பிக்கையுடனும், சந்தோஷத்துடனும் எதிர்கொள்வோம். இதுவரைக்கும் இருந்ததை விட 2018-ம் ஆண்டில் நாம் நினைத்தது எல்லாம் நடக்கட்டும். அனைவருக்கும் இனிய புத்தாண்டு நல்வாழ்த்துகள். உலகின் தலை சிறந்த சொல் - செயல்!

இவ்வாறு சிவகார்த்திகேயன் தெரிவித்திருக்கிறார்.