பொங்கல் விடுமுறைக்கு மதுர வீரன் வெளியீடு: விஜயகாந்த் தகவல்

 தனது மகன் சண்முகபாண்டியன் நடிப்பில் உருவாகியுள்ள 'மதுர வீரன்' பொங்கலுக்கு வெளியாகும் என விஜயகாந்த் அறிவித்திருக்கிறார்.

'சகாப்தம்' படத்தைத் தொடர்ந்து பி.ஜி.முத்தையா இயக்கத்தில் உருவான 'மதுர வீரன்' படத்தில் நடிக்கத் தொடங்கினார் சண்முகபாண்டியன். இப்படத்தில் சண்முகபாண்டியனோடு சமுத்திரக்கனி, பால சரவணன், 'நான் கடவுள்' ராஜேந்திரன் உள்ளிட்ட பலர் நடித்துள்ளார்கள். சந்தோஷ் தயாநிதி இசையமைக்க, ப்ரவீன் கே.எல் எடிட்டிங் பணிகளை கவனித்து வருகிறார்.

விஜி சுப்பிரமணியம் மற்றும் பி.ஜி.முத்தையா இருவரும் இணைந்து இப்படத்தை தயாரித்துள்ளார்கள். இதன் படப்பிடிப்பு முடிந்து இறுதிக்கட்டப் பணிகள் துரிதமாக நடைபெற்று வந்தன.

எப்போது வெளியீடு என்று தெரியாமல் இருந்து வந்த நிலையில், விஜயகாந்த் தனது ட்விட்டர் பக்கத்தில், "சண்முகபாண்டியன் நடிக்கும் 'மதுரவீரன்' திரைப்படம் 2018 பொங்கல் பண்டிகையன்று வெளிவருகிறது. இப்படத்தின் "என்ன நடக்குது நாட்டுல" பாடல் நாட்டின் த‌ற்போதைய அவல நிலையை தோலுரித்துக் காட்டுவதோடு, விழிப்புணர்வையும் ஏற்படுத்துகிறது. ஆர்.கே.நகர் இடைத்தேர்தலிலும் இப்பாடல் ஒலிபரப்பப்படுகிறது. " என தெரிவித்திருக்கிறார்.