சார்லி சாப்ளின் 2வில் முக்கிய கதாபாத்திரத்துக்கு பிரபு ஒப்பந்தம்

பிரபுதேவா நடித்து வரும் 'சார்லி சாப்ளின் 2' படத்தின் முக்கிய கதாபாத்திரத்துக்கு பிரபு ஒப்பந்தம் செய்யப்பட்டு, நடித்து வருகிறார்.

'சார்லி சாப்ளின்' படத்தைத் தொடர்ந்து, 'சார்லி சாப்ளின் 2' என்ற பெயரில் படமொன்றை இயக்கி வருகிறார் ஷக்தி சிதம்பரம். அம்மா கிரியேஷன்ஸ் நிறுவனம் தயாரித்துவரும் இப்படத்தில் பிரபுதேவா, நிக்கி கல்ராணி, அதா ஷர்மா உள்ளிட்ட பலர் நடித்து வருகிறார்கள். கோவாவில் இதன் முதற்கட்ட படப்பிடிப்பு முடிவுற்று, தற்போது சென்னையில் 2-ம் கட்ட படப்பிடிப்பு நடைபெற்று வருகிறது.

முதல் பாகத்தில் முக்கிய கதாபாத்திரத்தில் நடித்த பிரபு, 2-ம் பாகத்திலும் ஒப்பந்தம் செய்யப்பட்டு நடித்து வருகிறார். சென்னை படப்பிடிப்பில் பிரபு சம்பந்தப்பட்ட காட்சிகளை படமாக்கி வருகிறது படக்குழு. கிரேஸி மோகன் வசனம் எழுத, அம்ரீஷ் இசையமைத்து வருகிறார்.

2002-ம் ஆண்டு 'சார்லி சாப்ளின்' படம் வெளியாகி பெரும் வரவேற்பைப் பெற்றது. இப்படம் இந்தியில் 'நோ எண்ட்ரி', தெலுங்கில் ’பெல்லம் ஊர் எல்தே’, மலையாளத்தில் 'ஹேப்பி ஹஸ்பெண்ட்ஸ்’, கனனடத்தில் 'அல்லா புல்லா சுல்லா' மற்றும் போஜ்பூரி, ஒரியா, மராத்தி ஆகிய மொழிகளில் ரீமேக் செய்யப்பட்டது குறிப்பிடத்தக்கது.