ஆனந்த் ஷங்கர் படத்தின் மூலம் தமிழில் விஜய் தேவரகொண்டா அறிமுகம்

ஆனந்த் ஷங்கர் இயக்கவுள்ள புதிய படத்தின் மூலம் 'அர்ஜுன் ரெட்டி' நாயகன் விஜய் தேவரகொண்டா தமிழில் அறிமுகமாகவுள்ளார்.

'இருமுகன்' படத்தைத் தொடர்ந்து ஆனந்த் ஷங்கர் தனது அடுத்த படத்திற்கான கதை விவாதத்தில் ஈடுபட்டு வந்தார். இதிலும் விக்ரம் நடிக்கவுள்ளதாக தகவல்கள் வெளியாகின. ஆனால், அதற்கு படக்குழுவினர் மறுப்பு தெரிவித்திருந்தார்கள்.

தற்போது ஆனந்த் ஷங்கரின் அடுத்த படத்தை ஸ்டூடியோ க்ரீன் நிறுவனம் தயாரிக்கவுள்ளது. இதன் நாயகனாக விஜய் தேவரகொண்டா ஒப்பந்தமாகியுள்ளார். தெலுங்கில் மாபெரும் வரவேற்பைப் பெற்ற 'அர்ஜுன் ரெட்டி' படத்தின் நாயகன் விஜய் தேவரகொண்டா என்பது நினைவு கூறத்தக்கது. அவர் தமிழில் அறிமுகமாகும் முதல் படம் இதுவாகும்.

இதன் படப்பிடிப்பு பிப்ரவரியில் தொடங்கவுள்ளது. தற்போது முதற்கட்ட பணிகளில் மும்முரமாக ஈடுபட்டு வருகிறது படக்குழு. இப்படமும் தனது முந்தைய படங்களைப் போல வித்தியாசமான கதைக்களம் கொண்டதாக இருக்கும் என்று ஆனந்த் ஷங்கர் தெரிவித்திருக்கிறார். தமிழ் மற்றும் தெலுங்கு என இருமொழிகளிலும் தயாராகவுள்ளது.