மாரி 2 அப்டேட்: முக்கிய கதாபாத்திரத்தில் வரலெட்சுமி ஒப்பந்தம்

தனுஷ் நடிக்கவுள்ள 'மாரி 2' படத்தில் முக்கிய கதாபாத்திரத்தில் வரலெட்சுமி சரத்குமார் ஒப்பந்தம் செய்யப்பட்டுள்ளார்.

'வடசென்னை' மற்றும் 'எனை நோக்கி பாயும் தோட்டா' ஆகிய படங்களைத் தொடர்ந்து பாலாஜி மோகன் இயக்கத்தில் உருவாகவுள்ள 'மாரி 2' படத்துக்கு தேதிகள் ஒதுக்கியுள்ளார் தனுஷ். இதில் நாயகனாக நடித்து, தயாரிக்கவும் உள்ளார்.

இதன் முதற்கட்டப் பணிகள் மும்முரமாக நடைபெற்று வருகின்றன. நாயகியாக சாய் பல்லவி, முக்கிய கதாபாத்திரத்தில் கிருஷ்ணா, வில்லனாக டோவினோ தாமஸ், இசையமைப்பாளராக யுவன் ஆகியோர் ஒப்பந்தம் செய்யப்பட்டுள்ளார்கள்.

தற்போது முக்கியமான கதாபாத்திரத்தில் நடிக்க வரலெட்சுமி சரத்குமார் ஒப்பந்தம் செய்யப்பட்டு இருக்கிறார். தமிழ் மற்றும் தெலுங்கு என இருமொழிகளிலும் இப்படம் உருவாகவுள்ளது. மேலும், படப்பிடிப்புக்கான இடங்களைத் தேர்வு செய்யும் பணியில் இயக்குநர் பாலாஜி மோகன் ஈடுபட்டு வருகிறார்.