எனை நோக்கி பாயும் தோட்டா இறுதிக்கட்டப் படப்பிடிப்பு தொடக்கம்

 கவுதம் மேனன் இயக்கத்தில் தனுஷ் நடித்து வரும் 'எனை நோக்கி பாயும் தோட்டா' படத்தின் இறுதிக்கட்டப் படப்பிடிப்பு சென்னையில் தொடங்கப்பட்டு இருக்கிறது.

கவுதம் மேனன் இயக்கத்தில் தனுஷ், மேகா ஆகாஷ் நடிப்பில் உருவாகி வரும் படம் 'எனை நோக்கி பாயும் தோட்டா'. ஒன்றாக எண்டர்டையின்மண்ட் மற்றும் எஸ்கேப் ஆர்டிஸ்ட் நிறுவனம் இணைந்து இப்படத்தை தயாரித்து வருகின்றன.

பணப் பிரச்சினையில் இப்படத்தின் இறுதிக்கட்டப் படப்பிடிப்பு நிறுத்தி வைக்கப்பட்டு இருந்தது. இதனால் விக்ரம் நடிப்பில் உருவான 'துருவ நட்சத்திரம்' படத்தில் கவனம் செலுத்தத் தொடங்கினார் இயக்குநர் கவுதம் மேனன்.

இதனிடையே, பணப் பிரச்சினை தீர்க்கப்பட்டதால் விரைவில் 'எனை நோக்கி பாயும் தோட்டா' படத்தின் படப்பிடிப்பு தொடங்கப்படும் என தகவல்கள் வெளியாகின. ஆனால், எப்போது என்று தெரியாமல் இருந்தது.

இந்நிலையில், 'வடசென்னை' படத்திற்காக முழுக்க தாடி வளர்த்து மாறியிருந்தார் தனுஷ். அதன் படப்பிடிப்பு முழுமையாக முடிந்துவிடவே, தற்போது தாடியை முழுமையாக எடுத்து 'எனை நோக்கி பாயும் தோட்டா' படத்தில் கவனம் செலுத்தத் தொடங்கிவிட்டார். சென்னையில் படப்பிடிப்பு நடைபெற்று வருகிறது.

டிசம்பருக்குள் ஒட்டுமொத்த படப்பிடிப்பையும் முடித்து, பிப்ரவரியில் வெளியிடலாம் என்று முடிவு செய்திருக்கிறது படக்குழு. தர்புகா சிவா இசையமைப்பாளராக பணிபுரிந்து வருகிறார்.