கே.எஸ்.ரவிகுமார் இயக்கத்தில் அரவிந்த்சாமி

கே.எஸ்.ரவிகுமார் இயக்கவுள்ள புதிய படத்தில் நாயகனாக நடிக்க அரவிந்த்சாமி ஒப்பந்தம் செய்யப்பட்டு இருக்கிறார்.

சித்திக் இயக்கத்தில் உருவாகியுள்ள 'பாஸ்கர் ஒரு ராஸ்கல்' படத்தின் அனைத்துப் பணிகளும் முடிந்துவிட்டன. தற்போது இறுதிக்கட்டப் பணிகள் மும்முரமாக நடைபெற்று வருகிறது. ஜனவரியில் வெளியாகும் என தெரிகிறது.

மேலும், 'நரகாசூரன்', 'வணங்காமுடி' மற்றும் 'சதுரங்க வேட்டை 2' ஆகிய படங்களில் தற்போது கவனம் செலுத்தி வருகிறார் அரவிந்த்சாமி. அதனைத் தொடர்ந்து கே.எஸ்.ரவிகுமார் இயக்கவுள்ள புதிய படத்தில் நடிக்க ஒப்பந்தமாகி இருக்கிறார்.

தற்போது தெலுங்கில் பாலகிருஷ்ணா நடிக்கும் 'ஜெய்சிம்ஹா' படத்தின் பணிகளில் கவனம் செலுத்தி வரும் கே.எஸ்.ரவிகுமார், அப்பணிகளை முடித்தவுடன் தமிழில் அரவிந்த்சாமி நடிக்கும் படத்தில் கவனம் செலுத்தவுள்ளார்.

இப்படத்தையும் 'பாஸ்கர் ஒரு ராஸ்கல்' தயாரிப்பாளரே தயாரிக்கவுள்ளதாக தகவல்கள் வெளியாகியுள்ளன. மேலும், இக்கூட்டணி குறித்த அதிகாரபூர்வ அறிவிப்பு விரைவில் வெளியாகும் எனத் தெரிகிறது.