அருவி படத்தை தணிக்கைக் குழு எப்படி எடுத்துக்கொள்ளும் என பயந்தேன்: எஸ்.ஆர்.பிரபு

'அருவி' படத்தை தணிக்கைக் குழுவினர் எப்படி எடுத்துக்கொள்வார்கள் என்ற பயம் இருந்தது என்று எஸ்.ஆர்.பிரபு தெரிவித்திருக்கிறார்.

அருண் பிரபு புருஷோத்தமன் இயக்கத்தில் அதிதி பாலன், ஸ்வேதா சேகர் , அஞ்சலி வரதன் , மதன்குமார் உள்ளிட்ட பலர் நடிப்பில் உருவாகியுள்ள படம் 'அருவி'. ட்ரீம் வாரியர் பிக்சர்ஸ் நிறுவனம் தயாரித்திருக்கும் இப்படம் டிசம்பர் 15-ம் தேதி திரைக்கு வரவுள்ளது.

இப்படத்தின் பத்திரிகையாளர் சந்திப்பு சென்னையில் நடைபெற்றது. இதில் தயாரிப்பாளர் எஸ்.ஆர்.பிரபு பேசியதாவது:

இதுவரை நாங்கள் தயாரித்த திரைப்படங்களில் மிகச்சிறந்த படம் இது தான். உலகளவில் நடைபெற்ற திரைப்பட விழாக்களில் 'நீங்கள் தயாரித்த படங்களைப் பற்றி கூறுங்கள்' என்று கேட்கும் போது சில படங்களின் பெயர்களை மட்டும்தான் என்னால் கூற முடிந்தது. ஏன் எனது அனைத்து படங்களின் பெயர்களையும் கூற முடியவில்லை என்ற சிந்தனை இருந்தது.

அப்போதிலிருந்தே இனி பெயர் சொல்லும் வகையில் படங்களை தயாரிக்க வேண்டும் என்று முடிவு செய்தேன். ஒரு நாள் இரவு 9 மணிக்கு மேல் 'அருவி' படத்தின் கதையை இயக்குநர் அருண் பிரபு என்னிடம் கூறினார். கதை சொன்ன விதமே புதுமையாக இருந்தது. கதை சொல்லும் போது அந்தக் கதாபாத்திரமாகவே மாறி , இசையோடுதான் கதையைக் கூறினார்.

இப்படத்தின் கதையை பெரிதாக நம்பினோம். மக்கள் அதை எப்படி ஏற்றுக்கொள்ளப் போகிறார்கள் என்ற எதிர்பார்ப்பு எங்களுக்குள் இருந்து கொண்டே இருந்தது. அருவியைப் பொறுத்தவரை படத்தை நாங்கள் இந்தப் பொருட்செலவில்தான் தயாரிக்க வேண்டும் என்பதில் உறுதியாக இருந்தோம்.

இயக்குநர் மற்றும் படக்குழுவினர் அனைவரும் கடுமையாக உழைத்திருக்கிறார்கள். இயக்குநர் ஷங்கர் அவருடைய படங்களை எடுக்க எந்த அளவுக்கு மெனக்கெடுவாரோ அதே அளவுக்கு அருணும் அவருடைய குழுவினரும் அருவிக்காக உழைத்திருக்கிறார்கள்.

'அருவி' கதாபாத்திரத்தில் முதலில் இரண்டு முன்னணி கதாநாயகிகளிடம் பேச்சுவார்த்தை நடந்தது. அதன்பின்னர் புதுமுகத்துக்கே செல்லலாம் என்று முடிவெடுத்தோம். தணிக்கை குழுவினர் இப்படத்தை பார்த்துவிட்டு நன்றாக இருக்கிறது என்று பாராட்டினார்கள். அவர்கள் இப்படத்தை எப்படி எடுத்துக்கொள்வார்கள் என்ற பயம் என்னுள் இருந்துகொண்டே இருந்தது. ஆனால் அவர்களுக்கு இந்த படம் பிடித்திருந்தது. நல்ல படம் என்றார்கள். சில படம் எளிதாக சென்சார் ஆகிவிடும் என்று நினைப்போம் ஆனால் எதிர்பாராத ஒன்று நடைபெறும். அந்த வகையில் இது புதுமையாக இருந்தது

இவ்வாறு எஸ்.ஆர்.பிரபு பேசினார்.