அண்ணாதுரை படத்தின் முதல் 10 நிமிடக் காட்சிகளை வெளியிட விஜய் ஆண்டனி முடிவு

'அண்ணாதுரை' படத்தை விளம்பரப்படுத்த முதல் 10 நிமிடக் காட்சிகளை வெளியிட விஜய் ஆண்டனி முடிவு செய்திருக்கிறார்

'எமன்' படத்தைத் தொடர்ந்து 'அண்ணாதுரை' மற்றும் 'காளி' ஆகிய படங்களில் கவனம் செலுத்தி வந்தார் விஜய் ஆண்டனி. இதில் 'அண்ணாதுரை' படத்தின் பணிகள் முழுமையாக முடிவுற்று நவம்பர் 30-ம் தேதி வெளியீட்டிற்கு தயாராகி வருகிறது.

தற்போது இப்படத்தை விளம்பரப்படுத்தும் பணிகளைத் தொடங்கியுள்ளார் விஜய் ஆண்டனி. தனது 'சைத்தான்' படப் பாணியைப் போலவே 'அண்ணாதுரை' படத்தின் முதல் 10 நிமிடக் காட்சிகளை வெளியிட முடிவு செய்திருக்கிறார். நவம்பர் 15-ம் தேதி நடைபெறவுள்ள இசை வெளியீட்டு விழாவில் இதனை வெளியிட முடிவு செய்திருக்கிறார்.

மேலும், அன்றைய தினத்தில் வெளியாகவுள்ள பாடல்களை 'www.vijayantony.com' இணையதளத்தில் ரசிகர்கள் இலவசமாக பதிவிறக்கம் செய்து கொள்ளலாம் என்று அறிவித்திருக்கிறார் விஜய் ஆண்டனி

'அண்ணாதுரை' படத்தில் விஜய் ஆண்டனி, டயானா சம்பிகா, மஹிமா உள்ளிட்ட பலர் நடித்திருக்கிறார். ஸ்ரீனிவாசன் இயக்கியுள்ள இப்படத்தை விஜய் ஆண்டனி மற்றும் ராதிகா சரத்குமார் இருவரும் இணைந்து தயாரித்திருக்கிறார்கள்.