விஷாலின் இரும்புத்திரை ஃபர்ஸ்ட் லுக் வெளியீடு

மித்ரன் இயக்கத்தில் விஷால் நடித்து வரும் 'இரும்புத்திரை' படத்தின் ஃபர்ஸ்ட் லுக் வெளியிடப்பட்டுள்ளது.

'துப்பறிவாளன்' படத்தைத் தொடர்ந்து 'சண்டக்கோழி 2' மற்றும் 'இரும்புத்திரை' ஆகிய படங்களில் கவனம் செலுத்தி வருகிறார் விஷால். இவ்விரண்டு படங்களையும் விஷாலே தயாரித்து வருவது குறிப்பிடத்தக்கது.

மித்ரன் இயக்கத்தில் உருவாகிவரும் 'இரும்புத்திரை' படத்தின் இறுதிகட்ட படப்பிடிப்பு சென்னையில் தொடங்கியது. விஷால் - அர்ஜுன் இருவரும் பங்கேற்ற க்ளைமாக்ஸ் சண்டைக் காட்சிகள் படமாக்கப்பட்டன. அதனைத் தொடர்ந்து நவம்பர் 19 முதல் தென்காசியில் சில காட்சிகளை படமாக்க செல்லவுள்ளது படக்குழு.

அதோடு ஒட்டுமொத்த படப்பிடிப்பும் முடிவுற்று, பொங்கல் விடுமுறைக்கு வெளியிட முடிவு செய்திருக்கிறார்கள். அர்ஜுன், சமந்தா உள்ளிட்ட பலர் விஷாலுடன் நடித்திருக்கிறார்கள். யுவன் இசையமைக்க, ஜார்ஜ் வில்லியம்ஸ் ஒளிப்பதிவு செய்திருக்கிறார்.

இப்படத்தின் ஃபர்ஸ்ட் லுக் போஸ்டரை இணையத்தில் வெளியிட்டுள்ளது படக்குழு. இதற்கு திரையுலகினர் பலரும் விஷாலுக்கு வாழ்த்து தெரிவித்து வருகிறார்கள்.