சார்லி சாப்ளின் 2 கதைக்களம்: இயக்குநர் ஷக்தி சிதம்பரம் விளக்கம்

பிரபுதேவா நடிப்பில் உருவாகியுள்ள 'சார்லி சாப்ளின் 2' படத்தின் கதைக்களம் குறித்து இயக்குநர் ஷக்தி சிதம்பரம் விளக்கமளித்திருக்கிறார்.

'சார்லி சாப்ளின்' படத்தைத் தொடர்ந்து, 'சார்லி சாப்ளின் 2' என்ற பெயரில் படமொன்றை இயக்கி வருகிறார் ஷக்தி சிதம்பரம். அம்மா கிரியேஷன்ஸ் நிறுவனம் தயாரித்துவரும் இப்படத்தில் பிரபுதேவா, நிக்கி கல்ராணி, அதா ஷர்மா உள்ளிட்ட பலர் நடித்து வருகிறார்கள். கோவாவில் இதன் முதற்கட்ட படப்பிடிப்பு நடைபெற்று வருகிறது.

கிரேஸி மோகன் வசனம் எழுத, அம்ரீஷ் இசையமைத்து வருகிறார். இப்படத்தின் கதைக்களம் குறித்து இயக்குநர் ஷக்தி சிதம்பரம் கூறியிருப்பதாவது:

பிரபுதேவா - நிக்கி கல்ராணி இருவருக்கும் திருப்பதியில் திருமணம் நடக்க இருக்கிறது, அதற்காக பிரபுதேவா குடும்பமும், நிக்கி கல்ராணி குடும்பமும் திருப்பதிக்கு போகும்போதும், அங்கு போய்ச் சேர்ந்த பிறகும் நடக்கும் சம்பவங்களின் கலகலப்பான தொகுப்பே 'சார்லி சாப்ளின் 2'. திருப்பதிக்கு போனா திருப்பம் வரும் என்பார்கள். அது என்ன திருப்பம் என்பது படத்தின் சஸ்பென்ஸ்.

இவ்வாறு ஷக்தி சிதம்பரம் தெரிவித்திருக்கிறார்.

2002-ம் ஆண்டு 'சார்லி சாப்ளின்' படம் வெளியாகி பெரும் வரவேற்பைப் பெற்றது. இந்தியில் 'நோ எண்ட்ரி', தெலுங்கில் ’பெல்லம் ஊர் எல்தே’, மலையாளத்தில் 'ஹேப்பி ஹஸ்பெண்ட்ஸ்’, கனனடத்தில் 'அல்லா புல்லா சுல்லா' மற்றும் போஜ்பூரி, ஒரியா, மராத்தி ஆகிய மொழிகளில் ரீமேக் செய்யப்பட்டது குறிப்பிடத்தக்கது.