ராஜேஷ் இயக்கத்தில் சந்தானம்: டிசம்பரில் படப்பிடிப்பு தொடக்கம்

 ராஜேஷ் இயக்கத்தில் சந்தானம் நடிக்கவுள்ள புதிய படத்தின் படப்பிடிப்பு டிசம்பரில் தொடங்கவுள்ளது

'கடவுள் இருக்கான் குமாரு' படத்தைத் தொடர்ந்து தனது அடுத்த படத்திற்கான கதை விவாதத்தில் ஈடுபட்டு வந்தார் இயக்குநர் ராஜேஷ். அக்கதையைக் கேட்டு சந்தானம் நடிக்க முடிவு செய்ய, தேனாண்டாள் பிலிம்ஸ் தயாரிக்க முன்வந்தது.

தற்போது அப்படத்தின் திரைக்கதை அமைக்கும் பணிகள் முடிவுற்று, முதற்கட்டமாக நடிகர்கள் ஒப்பந்தம் துரிதமாக நடைபெற்று வருகிறது. டிசம்பரில் படப்பிடிப்பு தொடங்க படக்குழு முடிவு செய்திருக்கிறது.

டிசம்பர் 22-ம் தேதி சந்தானம் நடிப்பில் உருவாகியுள்ள 'சக்க போடு போடு ராஜா' படத்தை வெளியிட படக்குழு முடிவு செய்திருக்கிறது. இப்படத்தின் விளம்பரப்படுத்தும் பணிகளைப் பொறுத்து ராஜேஷ் இயக்கவுள்ள படத்திற்கு தேதிகள் கொடுப்பதை இறுதி செய்யவுள்ளார் சந்தானம்.

படப்பிடிப்பு தொடங்கப்படும் நாளன்று, இப்படம் குறித்த அதிகாரப்பூர்வ அறிவிப்பை வெளியிடத் திட்டமிட்டு இருக்கிறார்கள்.

ராஜேஷ் படங்களில் சந்தானம் காமெடியான நடித்தவை மிகப்பெரிய வரவேற்பைப் பெற்றுள்ளன. தற்போது நாயகனாக ஒப்பந்தமாகி இருப்பது குறிப்பிடத்தக்கது.