ஏ.ஆர்.ரஹ்மான் உருவாக்கியுள்ள ஷீர்டி சாயிபாபா பாடல்:டீஸர் வெளியீடு

பிரபல இசையமைப்பாளர் ஏ.ஆர்.ரஹ்மான், சினிமா படங்களுக்கு இசையமைப்பது மட்டுமின்றி, அவ்வப்போது பொதுவான பாடல்களை அடிக்கடி வெளியிட்டு வருகிறார். வந்தே மாதரம் முதலான இவரின் பாடல்கள் இன்றைக்கும் பேசப்படுகின்றன. எல்லோராலும் பாடப்படுகின்றன.

சமீபத்தில் குழந்தைகள் தினத்தன்று கூட, ஒரு பாடலைப் பாடி தன் முகநூல், ட்விட்டர் பக்கங்களில் வெளியிட்டிருந்தார். இந்த நிலையில், பகவான் ஷீர்டி சாயிபாபா குறித்து அவர் ஒரு பாடலை விரைவில் வெளியிட உள்ளார்.

இதுகுறித்து நேற்றிரவு, அதாவது குருவாரம் என்று சொல்லப்படும் வியாழக்கிழமையில் பாடலுக்கான டீஸரை வெளியிட்டுள்ளார்.

இருள் கவ்வியிருக்கும் திரையில் இருந்து, கொஞ்சம் கொஞ்சமாக வெளிச்சம் பரவ... சூரியக்கதிர்கள் முழுவதும் விரிந்திருக்க, விடிந்து வெளிச்சம் பரப்புகிறது. அதையடுத்து மேகக்கூட்டங்களைக் கேமரா காட்டிக் கொண்டிருக்கும் போதே, அந்த மேகக் கூட்டங்கள் விலக... வானில் இருந்து சாயிபாபா காட்சி தருகிறார். ஏ.ஆர்.ரஹ்மான் இசையில் விரைவில் எனும் டைட்டிலுடன் டீஸர் நிறைவு பெறுகிறது. 'ஆவோ சாய் 100' என்கிறது அந்த ஹிந்திப் பாடல் . அதாவது, 'வா சாய்... நூறு வயது' என்று அர்த்தம்!

இந்த சிலமணித்துளிகளைப் பார்த்ததுமே ரஹ்மான் ரசிகர்களும் சாயிபாபாவின் பக்தர்களும் உற்சாகமாகி, அதனை உடனே ஷேர் செய்து தங்கள் நட்பு வட்டத்தில் பகிர்ந்து கொண்டிருக்கிறார்கள்.