தீரன் படத்தின் உண்மை சம்பவம் நம்மை பிரமிக்க வைக்கும்: சூர்யா

'தீரன்' படத்தின் உண்மை சம்பவம் நம்மை பிரமிக்க வைக்கும் என்று சூர்யா தெரிவித்திருக்கிறார்.

வினோத் இயக்கத்தில் கார்த்தி, ரகுல் ப்ரீத் சிங் உள்ளிட்ட பலர் நடிப்பில் வெளியாகியுள்ள படம் 'தீரன் அதிகாரம் ஒன்று'. ட்ரீம் வாரியர் நிறுவனம் தயாரிப்பில் வெளியாகியுள்ள இப்படத்துக்கு ஜிப்ரான் இசையமைத்து இருக்கிறார்.

இப்படத்துக்கு விமர்சன ரீதியாக பெரும் வரவேற்பு கிடைத்துவரும் நிலையில், சூர்யா கூறியிருப்பதாவது:

'தீரன் அதிகாரம் ஒன்று' ஓர் உண்மை சம்பவத்தை மையமாக வைத்து காவல்துறை அதிகாரிகள் வாழ்நாளில் காணப்படும் வழக்குகளை வைத்து எடுக்கப்பட்ட படம். எவ்வளவுதான் கற்பனை செய்தாலும் உண்மை சம்பவம் நம்மை பிரமிக்க வைக்கும்.

தமிழ்நாட்டில் 10 வருடமாக கண்டுபிடிக்க முடியாத ஒரு வழக்கை இருபது காவல்துறை அதிகாரிகள் சேர்ந்து எப்படி கண்டுபிடித்தார்கள் என்பதே இப்படத்தின் கதை. இயக்குநர் வினோத்தின் எழுத்தும், இயக்கமும் சதுரங்க வேட்டையில் எப்படி பேசப்பட்டதோ அதே போல் இதிலும் பேசப்படும்.

ஜிப்ரானின் இசை அருமையாக உள்ளது. சத்யாவின் ஒளிப்பதிவு முழுமையாக பிரமிப்பை ஏற்படுத்தியது. இந்த படத்தின் மூலமாக அதிக விஷயங்கள் வெளியில் தெரியவரும். ஒரு காவல் துறை அதிகாரி வாழ்கையில் என்னென்ன நடக்கின்றது என்பதை இதன் மூலம் அறியலாம். உண்மையான சம்பவத்தோடு சேர்த்து கமர்ஷியல் படம் எடுத்துள்ளார்கள். திரையரங்கில் வந்து இப்படத்தை பாருங்கள்.

இவ்வாறு சூர்யா தெரிவித்திருக்கிறார்.