நவ.17 முதல் திரையிடல் நிறுத்தம்: டிச.15-ல் மீண்டும் நெஞ்சில் துணிவிருந்தால் வெளியாகிறது

நவம்பர் 17-ம் தேதி (நாளை) முதல் திரையிடல் நிறுத்தப்பட்டு, மீண்டும் டிசம்பர் 15-ம் தேதி வெளியாகவுள்ளது 'நெஞ்சில் துணிவிருந்தால்'.

சுசீந்திரன் இயக்கத்தில் சந்தீப், விக்ராந்த், மெஹ்ரீன், துளசி, ஷாதிகா நடிப்பில் உருவான 'நெஞ்சில் துணிவிருந்தால்' திரைப்படம் நவம்பர் 10-ம் தேதி வெளியானது.

விமர்சகர்கள், மக்களின் கருத்து மற்றும் நலம் விரும்பிகளின் கருத்துகளை கருத்தில் கொண்டு 'நெஞ்சில் துணிவிருந்தால்' படக்குழு, நாயகி சம்பந்தப்பட்ட காட்சிகளை முழுமையாக நீக்கியது.

இந்நிலையில், நவம்பர் 17-ம் தேதி (நாளை) முதல் தமிழகத்தில் உள்ள அனைத்து திரையரங்குகளிலும் 'நெஞ்சில் துணிவிருந்தால்' திரையிடல் நிறுத்தப்படும் என படக்குழு அதிகாரப்பூர்வமாக அறிவித்திருக்கிறது.

இது குறித்து சுசீந்திரன் வெளியிட்டுள்ள வீடியோ பதிவில் பேசியிருப்பதாவது:

நவம்பர் 10-ம் தேதி 'நெஞ்சில் துணிவிருந்தால்' வெளியானது. சில தவிர்க்க முடியாத காரணங்களால், இப்படத்தை மறுவெளியீட்டுக்கு திட்டமிடுகிறோம். டிசம்பர் 15-ம் தேதி வெளியீட்டுக்கு திட்டமிட்டு வருகிறோம். இப்படத்தைப் பார்த்த அனைவருக்கும் நன்றி

படத்தைப் பார்த்து விமர்சித்தவர்களுக்கும், உள்நோக்கத்தோடு விமர்சித்தவர்களுக்கும் நன்றி. தவிர்க்க முடியாத காரணத்தால் நாளை(நவம்பர் 17) முதல் தமிழகத்தில் எந்ததொரு திரையரங்குகளிலும் 'நெஞ்சில் துணிவிருந்தால்' திரையிடப்படாது. டிசம்பர் 15-ம் தேதி மீண்டும் வெளியாகும்

இவ்வாறு இயக்குநர் சுசீந்திரன் தெரிவித்திருக்கிறார்.

தற்போது 'ஏஞ்சலினா' என்ற பெயரில் புதுமுகங்கள் கொண்டு இயக்கியுள்ள படத்தின் இறுதிக்கட்ட பணிகளை கவனித்து வருகிறார் இயக்குநர் சுசீந்திரன்.