அவள் வரவேற்பு: படக்குழு மகிழ்ச்சி

சித்தார்த் நடிப்பில் வெளியாகியுள்ள 'அவள்' படத்துக்கு வரவேற்பு கிடைத்திருப்பதால், படக்குழு பெரும் மகிழ்ச்சியில் இருக்கிறது.

மிலந்த் ராவ் இயக்கத்தில் சித்தார்த், ஆண்ட்ரியா, அதுல் குல்கர்னி நடிப்பில் வெளியாகியுள்ள படம் 'அவள்'. சித்தார்த் தயாரித்துள்ள இப்படத்தை ட்ரைடண்ட் ஆர்ட்ஸ் ரவீந்திரன் வெளியிட்டு இருக்கிறார். விமர்சன ரீதியாகவும், வசூல் ரீதியாகவும் நல்ல வரவேற்பு கிடைத்திருப்பதால் பெரும் மகிழ்ச்சியில் இருக்கிறது படக்குழு.

விநியோகத்தில் இப்படத்திற்கான வரவேற்புக் குறித்து ரவீந்திரன் கூறியிருப்பதாவது:

இப்படத்திற்கு அபாரமான வரவேற்பும், பாராட்டுக்களும் கிடைத்து வருகிறது. இது நான் எதிர்பார்த்தது தான். இப்படம் உண்மையான, சிறப்பான திகில் படத்திற்குரிய ஆளுமையை நிருபித்துள்ளது.

இயக்குனர் மிலந்த் ராவ் தமிழ் சினிமாவுக்கு கிடைத்துள்ள ஒரு முக்கியமான வரவு. கதையம்சத்திலும்,தொழில்நுட்ப ரீதியிலும் இப்படத்தை உச்சத்திற்கு கொண்டு போயுள்ளார். 'அவள்' படத்தை வெளியிட்டதில் எனக்கு பெரும் மகிழ்ச்சி மற்றும் பெருமை. எனது வெற்றி பட பட்டியலில் 'அவள்' ஒரு முக்கிய இடத்தை பிடித்துள்ளது

இவ்வாறு அவர் தெரிவித்துள்ளார்.