குறுகிய கால தயாரிப்பாக உருவாகும் அடுத்த அஜித் - சிவா படம்

சிவா இயக்கத்தில் அஜித் நடிக்கவுள்ள புதிய படத்தை குறுகிய காலத்தில் உருவாக்க படக்குழு முடிவு செய்திருக்கிறது.

'வீரம்', 'வேதாளம்' மற்றும் 'விவேகம்' என மூன்று படங்களில் இணைந்து பணியாற்றியவர்கள் அஜித் மற்றும் சிவா. இவர்கள் இணைப்பில் கடைசியாக வெளியான 'விவேகம்' படத்தை சத்யஜோதி நிறுவனம்  தயாரித்திருந்தது.

மீண்டும் சிவா மற்றும் அஜித் இணையவுள்ள படத்தையும் சத்யஜோதி நிறுவனமே தயாரிக்கவுள்ளது. பிப்ரவரியில் படப்பிடிப்பு தொடங்க முடிவு செய்திருக்கிறார்கள். மேலும், குறுகிய கால தயாரிப்பாக இருக்க வேண்டும் எனவும் திட்டமிட்டு இருக்கிறார்கள். சுதந்திர தினம், சரஸ்வதி பூஜை விடுமுறை அல்லது தீபாவளி விடுமுறைக்கு வெளியிட வேண்டும் என்ற முனைப்பில் இருக்கிறது படக்குழு.

தற்போது திரைக்கதையை இறுதி செய்யும் பணியில் இருக்கும் இயக்குநர் சிவா, அதனைத் தொடர்ந்து நடிகர்கள் தேர்வில் ஈடுபட இருக்கிறார். யுவன் ஷங்கர் ராஜா இசையமைப்பாளராக பணிபுரியவுள்ளார்.