சாமி 2-ம் பாகத்திலிருந்து த்ரிஷா விலகல்

ஹரி இயக்கத்தில் விக்ரம் நடித்து வரும் 'சாமி' 2-ம் பாகத்திலிருந்து த்ரிஷா விலகியுள்ளார்.

'துருவ நட்சத்திரம்', 'ஸ்கெட்ச்' ஆகிய படங்களின் படப்பிடிப்பை முடித்துவிட்டு, ஹரி இயக்கத்தில் உருவாகும் 'சாமி 2' படத்தில் கவனம் செலுத்தி வருகிறார் விக்ரம். சென்னை, டெல்லி மற்றும் ஊட்டி உள்ளிட்ட இடங்களில் படப்பிடிப்பு நடைபெற்றது.

முதலில் இப்படத்தின் முக்கிய கதாபாத்திரத்துக்கு த்ரிஷா ஒப்பந்தம் செய்யப்பட்டார். ஆனால், அவருடைய காட்சிகள் படமாக்கப்படாமல் இருந்தது. மற்றொரு நாயகியாக ஒப்பந்தமான கீர்த்தி சுரேஷ் மற்றும் விக்ரம் சம்பந்தப்பட்டக் காட்சிகளைப் படமாக்கி வந்தது படக்குழு.

இந்நிலையில், 'சாமி 2' படத்திலிருந்து விலகியுள்ளார் த்ரிஷா. இது குறித்து தனது ட்விட்டர் பக்கத்தில், "படைப்பாக்கக் கருத்து வேறுபாட்டால், நான் சாமி 2 படத்திலிருந்து விலகத் தீர்மானித்தேன். படக்குழுவுக்கு நல்வாழ்த்துகள்" என்று தெரிவித்திருக்கிறார். அவருடைய விலகலுக்கான உண்மையான காரணம் என்னவென்று படக்குழு தெரிவிக்கவில்லை.

ஹரி இயக்கத்தில் உருவாகி வரும் 'சாமி 2' படத்துக்கு தேவி ஸ்ரீபிரசாத் இசையமைக்க, ஷிபு தமீன்ஸ் பெரும் பொருட்செலவில் தயாரித்து வருகிறார். சாமி முதல்பாகத்தில் நாயகியாக த்ரிஷாதான் நடித்திருந்தார் என்பது குறிப்பிடத் தக்கது.