அர்ஜுன் ரெட்டி ரீமேக்: நாயகியாக ஸ்ரேயா சர்மா ஒப்பந்தம்?

தமிழில் உருவாகவுள்ள 'அர்ஜுன் ரெட்டி' ரீமேக்கின் நாயகியாக ஸ்ரேயா சர்மாவிடம் பேச்சுவார்த்தை நடத்தப்பட்டு வருவதாக தகவல் வெளியாகியுள்ளது.

பாலா இயக்கத்தில் விக்ரமின் மகன் துருவ், 'அர்ஜுன் ரெட்டி' ரீமேக்கில் நடிக்க ஒப்பந்தமாகியுள்ளார். இதன் நாயகியாக ஸ்ரேயா சர்மாவிடம் படக்குழு பேச்சுவார்த்தை நடத்தி வருவதாக தகவல் வெளியாகியுள்ளது.

ஸ்ரேயா சர்மா சூர்யா - ஜோதிகா இணைந்து நடித்த 'சில்லுனு ஒரு காதல்' படத்தில் குழந்தை நட்சத்திரமாக நடித்தவர் என்பது குறிப்பிடத்தக்கது. 'அர்ஜுன் ரெட்டி' படத்தின் விவரங்களை ஒவ்வொன்றாக தனது இன்ஸ்டாகிராம் பக்கத்தில் வெளியிட்டு வரும் விக்ரம், நாயகிக்கான அறிவிப்பையும் விரைவில் வெளியிடவுள்ளார்.

'அர்ஜுன் ரெட்டி' படத்தின் தமிழ் மற்றும் மலையாள ரீமேக்/டப்பிங் உரிமையை கடும் போட்டிக்கும் இடையே இ4 எண்டர்டெயின்மென்ட் நிறுவனம் கைப்பற்றி இருக்கிறது.

சந்தீப் வங்கா இயக்கத்தில் விஜய் தேவரகொண்டா, ஷாலினி பாண்டே உள்ளிட்ட பலர் நடிப்பில் ஆகஸ்ட் 25-ம் தேதி வெளியான தெலுங்கு படம் 'அர்ஜுன் ரெட்டி'. குறைந்த திரையரங்குகளில் வெளியாகி, மக்கள் மத்தியில் பெரும் வரவேற்பைப் பெற்று கிடைத்த வரவேற்பால் திரையரங்குகளின் எண்ணிக்கை பல மடங்கு உயர்த்தப்பட்டது குறிப்பிடத்தக்கது.