ஷங்கர் எப்போதும் மற்றவர்களுக்கு முன்னோடியாக உள்ளார் : ஏ.ஆர்.ரஹ்மான் புகழாரம்

ஷங்கர் எப்போதும் மற்றவர்களுக்கு முன்னோடியாக உள்ளார் என்று '2.0' இசை வெளியீட்டு விழாவில் ஏ.ஆர்.ரஹ்மான் புகழாரம் சூட்டினார்.

ஷங்கர் இயக்கத்தில் ரஜினி நடிப்பில் உருவாகியுள்ள படம் '2.0'. துபாயில் இப்படத்தின் இசை வெளியீட்டு விழா BURJ PARK-ல் பிரம்மாண்டமாக நடைபெற்றது. இதில் ஒட்டுமொத்த '2.0' படக்குழுவினரும் கலந்து கொண்டனர்.

இவ்விழாவில் ஷங்கரின் முதல் படத்திலிருந்து இப்போது வரை அவரோடு பணிபுரிந்த அனுபவம் குறித்த கேள்விக்கு ஏ.ஆர்.ரஹ்மான், "எதுவுமே மாறவில்லை. எல்லாம் அப்படியே உள்ளன. ஷங்கர் இப்போதும் கடினமான, இயல்பான, தரம் குறித்த சிந்தனை உள்ள மனிதராகவே இருக்கிறார்.

எப்போதும் மற்றவர்களுக்கு முன்னோடியாக உள்ளார். ரசிகர்களை உற்சாகப்படுத்தவே நாங்கள் விரும்புகிறோம். அதற்காக, புதிது புதிதாக எதேனும் தர முயற்சிக்கிறோம். ஷங்கர் தன் வேலையின் மீது தீராத காதல் கொண்டவர். அவரது அர்ப்பணிப்பு எப்போதும் என்னைக் கவரும். அதேபோல், எனது வேலையும் அவரைக் கவருவதாகக் கூறுவார். இது பரஸ்பரப் புரிதல்" என்று தெரிவித்தார்.

அதற்குப் பிறகு இசை வெளியீட்டு விழாவின்போது ஏ.ஆர்.ரஹ்மான், "இவ்விழாவில் '2.0' படத்தின் இரண்டு பாடல்களை மட்டுமே வெளியிடுகிறோம். '2.0' படத்தில் இன்னும் நிறைய வேலைகள் பாக்கி உள்ளன. எனவே ஒரு பாடலையும், தீம் மியூசிக் இசை கோர்ப்புகளையும் இன்னும் ஒரு மாதத்தில் வெளியிடுவோம்.

பின்னணி இசைக் கோர்ப்புகளையும் வெளியிட உள்ளோம். மக்கள் எங்களிடமிருந்து இன்னும் எதிர்பார்க்கிறார்கள். பின்னணி இசைக் கோர்வைகளை வெளியிடச் சொல்கிறார்கள். பட வெளியீட்டுக்கு இன்னும் இரண்டு மாதங்கள் இருப்பதால், அதைச் செய்துவிடுவோம்" என்றார்.